CHAPTER 3

Tuluyan namang naglandas ang mga luha niya dahil sa sinabi ng kaibigan. Sinabi niya sa sarili na magsi-celebrate siya ngayong gabi dahil single na ulit siya pero heto't umiiyak na naman siya. Wala na yatang katapusan ang pag-iyak niyang ito.

Sakto namang pagdating ni Faye bitbit ang drinks nila. Kinuha niya kaagad ang tequila at diritsong nilagok ito. Mabuti nalang at maraming inorder ang kaibigan. Mukhang malalasing talaga siya ng bongga ngayong gabi.

"Hey... anong problema mo ha beshy? Parang tubig lang ang tequila ah? Broken ka ano?!" tanong nito sa nang- aasar na tono.

Sopistikada itong umupo sa tabi niya at may kinawayan pang mga kalalakihan sa kabilang mesa.

"Don't get me wrong, ganyan na ganyan din kasi ako dati noong na-heartbroken ako nung letcheng lalake na iyon!" dagdag pa nito.

Hindi niya ito sinagot. Pinagpatuloy lang niya ang pag-inom ng alak na parang wala ng bukas. Kaya naman, bumaling ito kay Cora at nagtanong kung napano siya.

"Hayaan mo na muna yang mag-walwal ngayon. Bukas mo nalang siya tanungin" sabad naman ng kaibigan.

Tumango-tango naman si Faye rito at sinabayan nalang siya sa pag-inom ng alak. Inaya pa siya nitong sumayaw na kaagad naman niyang tinanggap.

Nang gabing iyon, nagpakasaya siya. Nilunod niya ang sarili sa alak upang makalimot kahit pansamantala.

Nabalik siya sa reyalidad nang marinig ang pagtawag ni Cora galing sa kusina.

"Handa na ang pagkain..." anunsyo nito sa kanila.

Nagluto ito ng Sinigang na Hipon. Paborito niya. Para daw iyon sa hang-over. Hindi kasi uminom si Cora kagabi at siya raw ang magmamaneho. Kaya sila lang ni Faye ang nagpakalunod sa alak. May hang-over stew at tteokbokki na korean dish. Paborito ni Faye. May iba pa siyang niluto na paborito nilang tatlo.

Nagmukhang piyesta tuloy ang mesa niya. Masarap ang lahat ng pagkain.

Magaling din kasing magluto si Cora. Halos lahat yata ng talent nandito na. Kung siya, sinalo ang kagandahan. Si Cora naman ay sinalo lahat ng talento na ibinigay ni Lord. Pwede na nga itong mag-asawa. Jackpot talaga ang magiging future husband nito kung sakali.

Habang si Faye naman ay magaling sa pag-awit. Noong nagpaulan si Lord ng talento sa pag-awit ng pagkalamig-lamig, sinalo yata lahat ni Faye. Kahit anong kantahin nito kasi ay makakatulog ka talaga!

Bentang-benta rin ang sense of humor nito na nakukuha niya minsan. She's really proud of them. Malayo man ang mga parents nila pero heto sila at kapiling ang isa't isa. Nasa Spain kasi ang parents niya.

May mga negosyo din kasi sila doon na kailangang asikasuhin. Samantalang ang parents naman ni Cora ay nasa Russia. Ang kay Faye ay nasa UK pero okay lang naman 'yon. Isang pamilya na naman silang magkaibigan.

May nawala mang isa sa mga kaibigan niya pero nandito naman ang dalawang taong palagi niyang maaasahan. Masasandalan sa hirap man o ginhawa. Ano pa nga ba ang kulang?

They are all successful. Silang tatlo ay tinangguriang "The Young Billionaires" at the age of 26, magkaiba lang sila ng birth months. Si Faye, September. Si Cora naman ay July then siya? December.

Isa-isa niyang tiningnan ang dalawang kaibigan. Napangiti nalang siya habang masaya silang tatlo na kumakain ng pananghalian at nagku-kwentuhan.

Maya-maya pa ay itinaas ni Faye ang bowl na may sabaw at tiningnan siya.

"Alam mo beshy, marami pang isda sa dagat. Wag ka doon sa shokoy" pabiro nitong pasaring sa kanya.

Natawa naman sila ni Cora sa sinabi ni Faye.

"Grabe ka naman sa shokoy beshy... Eh sa'n ba kasi ang dagat na iyan at nang makapag-swimming ako" pabiro niyang sagot dito.

"So, magsi-swimming ka lang? Di ka manghuhuli ng isda?" balik nitong tanong sa kanya.

Tiningnan niya ang soup na mainit pa habang dahan-dahang hinahalo ito.

"Kahit nga seguro isda ngayon,hindi na faithful" malungkot na wika niya sa mga kaibigan.

Hinipan niya muna ang soup bago tinikman. As usual, masarap talagang magluto si Cora kung kaya,busog na busog sila ni Faye. Sa dami ba naman ng nilutong putahe ni Cora. After nilang magligpit ng pinagkainan, si Faye na ang nagpresenta na maghugas ng mga plato while Cora on the other side, niligpit ang mga natirang pagkain at inilagay sa ref. Habang siya? Nakatunganga lang.

Ayaw din naman siyang pakilosin ng mga kaibigan niya. After that, they decided na manuod nalang muna ng movie sa sala para naman ma-digest ang kinain nila. Dito kasi muna titira sina Cora at Faye. Babantayan daw siya ni Cora at sasamahan sa journey of moving on. Si Faye naman, sinabi na babantayan daw siya kung sakaling maisipan niyang magpakatanga ulit kay Noah. Well, hindi niya rin masisisi ang kaibigan. Binalak nga niyang patawarin ang gago diba?

Work from home lang muna ang naisip nila for now. Sila nga lang muna because she took a break. Iyon din ang advice nina Cora at Faye sa kanya. Segurado naman kasing lutang pa siya dahil sa mga nangyari sa kanya. Hindi rin siya makakapag-work as usual. Mabigat parin ang pakiramdam niya pero hindi na niya nalang inalintana pa iyon. Kailangan niyang mag-move forward. Masakit man sa una pero alam niyang malalagpasan niya ito. Sa tulong na rin ng mga kaibigan niya. Maya-maya pa ay nilingon sila ni Cora.

"Anong gusto niyong panuorin guys?" tanong nito sa kanila habang busy sa kaka-scroll sa flat screen TV, "Ito nalang kaya? Documentary about different tribes?"

Nagkatinginan naman sila ni Faye dahil sa suggestion ni Cora. Nagkibit-balikat lang ang kaibigan. Tumango naman siya kay Cora. Wala rin namang siyang pakialam sa movie. Alam niya sa sarili niya na hindi rin siya makakapag-focus doon. Cora played the movie. Pinanuod nalang din niya ito.

"Ang dami namang tattoo nila. Gosh! Nakakatakot! Ang la-laki pa ng mga katawan. Kapag niyakap ka niyan, for sure, basag ang bones mo" reklamo pa ni Faye habang lukot ang mukha na nakatingin sa pinapanuod nila ngayon.

Natawa siya sa sinabi nito kaya naisipan niya na asarin ang kaibigan. Total naman, badtrip siya. Ba-badtripin nalang din niya si Faye. Damay-damay na'to. What are friends are for diba? Napahagikhik nalang siya sa naisip. Si Faye pa naman ang madaling asarin sa kanila.

"Hoy beshy, bakit ka tumatawa d'yan? Wag mong sabihin na nabaliw ka na dahil sa break up niyo ni Noah?"

Pinandilatan naman niya ito ng mga mata.

"Akala ko ba gusto mo'kong makapag-move on?! Bakit mo binanggit ang pangalan ha?!" sagot naman niya rito, "Natawa lang ako kasi diring-diri ka sa pinapanuod natin. Not knowing na baka nga nand'yan ang The One mo"

"Eeeewwww! Kilabutan ka nga d'yan Amara! Hinding-hindi 'yan mangyayari no! Isa pa, ang layo-layo niyan. Baka nga kahit dito sa Pilipinas, hindi na 'yan nag-e-exist eh. Baka naman ikaw, nand'yan ang true love mo" pang aasar din nito pabalik at tinaasan pa siya ng kilay.

Natawa nalang siya sa reaction nito. Kapag ganyan na binanggit na ni Faye ang pangalan niya. Ibig sabihin lang noon ay naaasar na ang kaibigan.

On the other hand, napaisip naman siya sa sinabi ni Faye.Paano kaya kung isang taga-tribo talaga ang para sa kanya?

Tiningnan niya si Faye na ngayon ay nakahiga na sa mga hita ni Cora at nagsusumbong. Para talaga itong bata. Hindi parin nag-mature.

"Alam mo beshy, okay lang naman seguro kung ganyan ang makatuluyan ko. Basta ba, hindi ako sasaktan. Isipin mo, nakailang ex na ba ako? Anim na. Imagine? pero lahat sila, niloko ako" malungkot na wika niya sa kaibigan

Bumangon si Faye at saka maayos na naupo sa harapan niya. Tiningnan siya nito nang may malamlam na mga mata.

"Alam mo kasi beshy, love without romance is nothing. Ikaw naman kasi, kahit halik. Bawal sayo. Dapat holding hands lang at kapag halik naman, dapat sa cheeks lang. Ano kayo nun? Magkaibigan? Parang hindi kayo mag-syota!"

Pinitik naman ni Cora si Faye sa ilong na ikinareklamo nito lalo.

"That's her choice. Modern Maria Clara 'tong kaibigan natin eh"

Nag-thumbs up naman siya kay Cora na ikinatawa lang nito.

"Masama ba 'yon? Gusto ko lang naman na kapag kinasal kami, buong-buo kong maibibigay ang puso't kaluluwa ko sa kanya. Pati katawan. Hindi naman porke't liberated akong tingnan at may negosyo na puro kalaswaan ay ganoon narin ako. Ipinamana lang naman iyon sa akin nila Daddy. Masama bang mangarap?"

Nilapitan siya ni Faye at hinawakan ang mga kamay.

"Wala namang masama doon beshy. Kaya lang, that's not how the world works. Sa panahon ngayon, baka nga kahit ganyang taga-tribo eh wild na rin" sabay turo sa TV.

Napabuntong-hininga nalang si Amara sa sinabi ng kaibigan. Niyakap naman siya nina Cora at Faye.Wala na ba talagang maginoo sa panahon ngayon? Iyong papasa sa standards niya?