Chapter 4.1

Verania's Point of View

Dahil nga naitulak na ako sa pool ng kapatid ni Clara, wala na akong choice kung hindi samahan nang magtampisaw sa tubig ang batang 'yon. Mabuti na lamang at may doble akong cycling shorts kung hindi magtatampisaw ako rito ng naka-track pants.

"Mabuti at marunong kang lumangoy," puri ko kay Sandra na ang galing magpalutang ng sarili sa tubig.

"Ate Vera dito ka raw nakatira?" mataray na tanong niya sa akin.

"Oo, bakit?" umarko ang kilay ko nang ibato ko sa kanya ang patanong na sagot kong iyon. Bakit kasi ang taray taray niya...

"Hindi ka naman mang-aagaw ng jowa 'di ba?" tanong niya pa na nagpalaglag ng panga ko.

Aba't kay bata-bata alam na ang mga ganoong bagay!

"Hindi 'no!" agad na depensa ko kaya napasinghap siya.

"Sure? Boyfriend siya ni Ate..." wika niya kaya napailing ako.

"Oo naman, aanhin ko si Ares? Nagtatrabaho lang naman ako dito ano, nurse, driver, bodyguard..." wika ko at nanlaki ang mga mata niya.

"Nurse? Meron ka ng mga injection? Yung may karayom na kasing laki nito?" saad niya sabay pakita ng index finger niya sa akin kaya napatawa ako.

"Oo, gusto mo iturok ko sa 'yo dahil sa pagtulak mo sa akin kanina?" tanong ko habang naka-arko ang kilay.

"No! Ayoko," takot na saad niya at medyo napalakas yata iyon dahil umepal si Ares.

"Are you frightening her?" saad ni Ares mula sa malayo kaya inilipat ko ang matalim na paningin ko sa kanya sabay kunot ng noo.

"Pwede ba, Ares?" inis na saad ko at inirapan siya nang marinig ko ang mahinang paghagikgik ni Sandra.

"Laging ganyan si Kuya Ares kapag may nang-aaway sa akin."

"Hindi naman kita inaaway ah?"

"Hayaan mo na siya, Ate. Dahil cool ka, bati na tayo," saad niya kaya napasinghap ako.

Hindi naman kami nagaway, bakit kami magbabati?

"Bodyguard ka rin sabi mo? Edi nakahawak ka na ng shotgun 'te?" tanong niya kaya napatawa ako kaya umarko ang kilay niya.

"Shotgun? Hindi pa, pero yung ibang baril, oo nakahawak na ako," saad ko at napanguso siya.

"Ate, may tanong pa pala ako." saad niya kaya tiningnan ko siya habang lumalangoy.

Nang makarating siya sa may hagdanan ay naupo siya roon.

"Ano 'yon?" tanong ko gamit ang kaswal na tono.

"Ah, Ate type mo ba si Kuya Ares? Kasi sa mga napapanood ko sa TV namin laging magkaaway sa una yung nagkakagustuhan eh," saad niya kaya nasamid ako.

Seriously? Ano ba ang pinapanood nito at ganito na ang mga tanungan niya?

"Hindi nga, kulit nito! Imposibleng mangyari, okay? At pwede yung mga napagusapan natin ay tayong dalawa lang ang makaalam kasi kapag hindi tuturukan kita ng karayom..." pananakot ko pero natawa lamang siya at tumango.

"Hehe, ate okay!" masiglang sagot niya at umahon na kami mula sa pool.

"Magpapalit na ba tayong damit?" tanong niya sabay takbo niya papunta sa table na hindi kalayuan sa pool.

"Bakit? Wala ka na bang balak mag-swimming pa?" saad ko sabay angat ng isa kong kilay.

"Hmm..." wika niya at kumunot pa ang noo na tila nag-iisip.

"Eenie meenie, miney mo... pwet ng kabayo kamukha mo... babalik, babalik sa dati mong pwes...to!" pagkanta niya habang palipat-lipat ang hintuturo sa pool at sa bag niyang nasa table.

Tumigil ang daliri niya sa bag at ngumisi.

"Magbanlaw na tayo, Ate!" saad niya kaya napataas ang kilay ko.

"E, papaano si Kuya Ares mo? Binabantayan ko siya..." saad ko kaya napanguso siya.

"Okay, mamaya ka na lang magbanlaw. Pero maglaro na muna tayo!" masiglang saad niya at napakurap ako sa mabilis na pagpayag niya.

"Magpalit ka muna ng damit mo pang-itaas baka sipunin ka pa ipahid mo pa sipon mo sa 'kin," saad ko at napahagikgik siya sabay lingon sa damit ko.

"Hehe Ate Vera, sexy ka pala!" nakangiting saad niya sabay hablot sa bag para kumuha ng damit pamalit.

Napakamot batok ako saka napailing at hindi sinasadyang napalingon sa pwesto nina Ares. Nakalingon siya rito at nakaangat ang isang kilay pero nang magtama ang mga mata namin ay agad na umiwas siya. Problema no'n?

Nang makakuha na nga si Sandra ng damit ay agad niya itong iniabot sa akin. Alam ko na ang nais niyang iparating nang kuhanin ko iyon.

Itinaas niya kasi ang dalawa niyang kamay at isa lang ang ibig sabihin nito, nagpapabihis siya sa akin. Nang mabihisan ko siya agad siyang umupo sa upuan na nasa tabi ng table kaya ako rin naman ay naupo sa harap niya sa kung saan tanaw na tanaw ko sina Ares. Hindi porket may alaga pa akong isa ay hahayaan ko na ang isa.

"Ano nga pala ang lalaruin natin?" tanong ko nang mapansin na nagkakalkal na naman siya sa bag niya na akala mo ay bulsa ni Doraemon dahil hirap na hirap yata siyang kunin ang bagay na kinukuha niya dahil sa dami ng laman.

"Ate wait lang," wika niya kaya umarko na naman ang kilay ko sabay pinag-ekis ang braso ko sa harap habang naghihintay sa kanya.

Nagulat na lamang ako nang sumigaw si Ares hindi kalayuan sa amin.

"Vera!" malakas na tawag niya kaya hindi pa nakakalipas nag ilang segundo ay nakapag-martsa na ako patungo sa harapan niya.

"Ano iyon? Kamahalan?" inis na wika ko dahil may kausap na nga siyang iba nang-iistorbo pa.

Nagulat ako nang may iabot siya sa akin na tuwalya...tila nakonsensya ako sa pagsusungit ko kani-kanina lang.

"Baka lamigin ka," kaswal na saad ni Ares at napalingon ako kay Clara.

Nakangiti lang siya kaya napapakamot batok ako nang kunin ko ang tuwalya na inaabot ni Ares.

"Salamat," maikling wika ko sabay balik sa kinauupuan ko.

Saktong pag-upo ko naman ay nahanap na ni Sandra ang kinakalkal niya sa bag na dala niya.

"Yehey! Nahanap ko na!" masayang saad niya at nagmulagat ang mga mata ko nang makita ko kung ano iyon. Baraha! Oo baraha! Anong trip nitong batang ito at sa lahat ng laruan na pwedeng dalhin ay baraha pa!

"Iyan ba ang lalaruin natin?" gulat na tanong ko at napatango siya agad.

"Oo naman!" masiglang sagot niya kaya napakurap ako ng ilang beses. Iba talaga nag batang 'to.

"Masaya 'to, alam mo 'yung tongits 'te?" tanong niya nang hindi na naman ako nakapagsalita.

"Oo naman, bakit iyon ba ang lalaruin natin?"

"Oo Ate! Ano, tara?"

"Hindi ka ba papagalitan ni Clara? Baka magalit siya sa atin," kaswal na tanong ko at umiling siya.

"Hindi siya magagalit, nakalaro ko na siya!" saad niya kaya napailing ako.

"Saan ka natuto nito?"

"Sa ads ng youtube 'yung sa games ng tongits sabi magkakapera ako e wala naman hmp! Bibili sana akong glue gamit 'yon e, panggawa ng slime," saad niya kaya napatawa ako.

"Hala, ang yaman yaman mo tapos bibili ka lang ng glue sa tongits pa, eh kung sinabi mo 'yan sa magulang mo... e 'di tapos!" saad ko at napakamot siya sa batok niya sabay nguso pa.

"Ayaw ni Mommy, dinidikit ko raw yung slime sa buhok ko," saad niya kaya halos masamid ako sa pagtawa.

"Baka daw masira lang buhok ko kakagamit ng iba't ibang tricks pang-tanggal ng dikit," saad niya at pinamigay na niya ang baraha.

"Huwag mo na uulitin 'yon ha?" saad ko at napataas siya ng kilay sabay sulyap sa akin.

"Ang alin 'te? 'Yung idikit ang slime sa buhok ko?" tanong niya at napasinghap ako.

"Oo 'yan, tsaka 'yong naglalaro ka online para magkapera. Minsan scam pa 'yon, ano pa mangyari sa 'yo. Tsaka huwag na huwag kang hahanap ng pera sa laro. Sugal 'yon baka maadik ka," medyo napahabang paliwanag ko at napatango siya habang nakanguso.

"Okay, Ate Vera," saad niya nang matapos siyang mamigay ng cards.

Habang kasalukuyan kaming naglalaro, napansin ko ang kinalulugaran nina Ares at Clara na masayang-masaya na nag-uusap.

"Matagal na bang nililigawan ni Ares yung ate mo?" tanong ko habang diretso pa rin ang tingin kay Ares na alam kong hindi alam na tinititigan ko siya.

"Matagal na 'te. Lagi nga dumadalaw si Kuya Ares sa bahay kapag sabado ng gabi nagbibigay ng luto niya. Tapos naririnig ko rin kapag lunch na hinahatidan ni Kuya Ares si Ate Clara ng pagkain sa ospital," mahabang kwento niya kaya kumunot ang noo ko sabay sulyap kay Ares.

"Madalas niyang ginagawa 'yon?" tanong ko at tumango si Sandra kaya suminghap akong muli.

snsp