CHAPTER 3

Mabilis nakaalis si Zyrex ng Black District. Malayang nakakalabas-pasok ang sinuman sa Black District basta hindi hinatulan ng White District. Ang mga kriminal na nahatulan ay nilalagyan ng sensor sa katawan. Kapag lumabas ito ng Black District ng walang pahintulot, tutugisin sila ng Elite Soldiers ng White District. Walang sinuman sa lahat ng distrito ang ninais na makaharap isa man sa Elite Soldiers. They are the protectors of the Urvularia Ruler, kaya't kinatatakutan ang mga ito. Samantalang bihira naman umaalis ng Black District ang mga simpleng mamamayan. Karaniwan lang ay ang mga scholar na pumapasok sa Orange District.

...

...

“Panibagong kaso na naman ng pagpatay," naiiling na sambit ng isang pulis habang isa-isang pinagmamasdan ang nagkalat na katawan.

“Sir.” Sumaludo si SPO1 Corales sa bagong dating.

Sumaludo rin ang ibang mga pulis ng makita ang Special Forces Head ng Crime Department. Bahagya lang tumango ang bagong dating sa mga kasamahan at pumasok sa loob ng dilaw na linya.

“Di ba siya yung sikat na Detective ng Yellow District?” puna ng isang columnist na nagcocover ng insedente.

Hindi naman maitago ang paghanga ng lahat sa bagong dating na detective.

“Mas gwapo pala siya sa personal,” humahangang sambit ng babaeng reporter sa binatang Detective.

“Halika, kuhaan natin ng interview si Detective Xero, pagkakataon na natin to.”

Nagmamadaling lumapit ang isang grupo ng reporter sa kinatatayuan ng Detective.

“Hindi kayo pwedeng lumapit.” Hinarang ng mga pulis ang naglakas loob na mga reporter.

“Isang scoop lang Sir,” sambit ng babaeng reporter.

Aangat ang sales ng kumpanya nila kapag naicover sa kanilang pahayagan ang detective. Maraming matataas na pahayagan sa Purple District at isa sila sa mababa ang sales. Kailanman ay hindi nagbibigay ng interview sa kahit anong pahayagan si Detective Xero. Masyado itong mailap sa media. Kahit ito pa ang ace agent ng Mend Organization.

“Hindi pwede,” matigas na sambit ng pulis.

“Gusto lang namin mainterview si Detective Xero,” pagpupumilit ng babae.

“Hindi nga pwede Miss,” naiinis na pigil ng pulis.

“Bakit ba…?”

“Paalisin na daw lahat ng media,” putol ng isa pang pulis sa sasabihin ng babae.

Gusto pa sanang magreklamo ng mga taga-media pero wala na rin silang nagawa.

...

...

“Identity?” seryosong tanong ni Detective Xero habang sinusuri ang mga guhit na kinalalagyan ng mga katawan.

Dinala na sa morgue ng Black District ang mga bangkay for cremation.

“Mga ordinaryong law breakers na pinatapon ng White District dito. Ngunit nakapagtatakang nasangkot ang isang Assassin ng Havoc Organization.”

Tumayo si Detective Xero at hinubad ang suot na puting gwantes. May mga palatandaan sa katawan ang mga myembro ng Havoc kaya't mabilis nilang na-identify ang bangkay.

“Send me the report asap.” Sumaludo ang mga pulis ng tumalikod ang Detective.

Karaniwan na ang ganitong insidente sa Black District. Bilang isa sa nagpapatupad ng kaayusan sa Urvularia, ang Mend Organization ng Yellow District ang umaayos sa mga bangkay. Kapag napatunayan nilang hindi makatwiran ang pagpatay, pinaparusahan ng White District kung sinuman ang sangkot. Mayroon silang Headquarter sa Black District dahil ito ang palaging may gulo sa buong City.

...

...

Bumalik si Detective Xero sa kanyang sasakyan sa labas ng eskinita. Ngunit natigil siya sa paghakbang ng bahagyang gumalaw ang tambak ng b****a. Kalmado niyang pinagmasdan ang kung anuman ang lalabas doon. Kumunot ang noo niya ng makita ang isang kamay. Sumunod ang paglitaw ng katawan ng humihikab na babae.

“Gutom na ako,” sambit nito at kinusot ang mata.

Pinagsisipa nito ang mga nakaharang na supot bago tumayo. Sumabit pa ang paa nito sa kumpol ng b****a. Bahagyang umatras si Xero para hindi ito tumama sa sapatos niya.

“Aray ko,” reklamo nito ng madapa bago balewalang bumangon.

Kumunot ang noo nito ng makaharap ang binatang detective. Nagpalinga-linga ito sa paligid at bumalik ang paningin sa kaharap.

“Sino ka?” tanong nito sa kaharap.

Wala naman naging reaksyon ang binata. Pinagmamasdan niya lang ang kaharap at nagtataka kung bakit dito nito napiling matulog kung saan may crime scene. Nakatitig lang ang babae pero nagkibit balikat rin at umalis sa lugar.

...

...

...

Karaniwang paligid at ingay ang sumalubong sa kay Reyna ng makarating sa pamilihan ng Black District.

“Bili na kayo mga suki. Murang-mura lang. Masarap, malinamnam. Swak sa budget at swak sa wallet. Prutas po kayo diyan!” sales talk ng isang tindera.

“Buy one take one ito Misis. Makakatipid ka ng husto dito. Bumili kana,” pangungumbinsi naman ng isa.

“Suki, ibigay mo na sakin ito ng wampipti, bibili ako ng tatlo,” tawad presyo ng isang mamimili.

“Mga Ma'am, Sir! Prutas po kayo riyan," alok niya sa mga namimili. "Ate... mansanas? Para grado mo'y tumaas.” kumindat pa siya sa isang studyante na dumaan.

“FYI honor student ako!” galit nitong sambit at tinalikuran siya. Nakauniporme ito ng nag-iisang paaralan sa Orange District. Bukod sa White District, doon lang may isa pang paaralan sa buong Urvularia.

Kinuha naman ni Reyna ang isang kumpol ng gulay.

“Ale... Bili na ng gulay pampahaba ng buhay.”

“Anong palagay mo sa 'kin? Malapit nang mamatay?” Mas nagalit ito sa kanya at tinalikuran siya.

Hindi niya intensyon na magalit ito pero huli na niyang napansin ang itsura ng Ale. Sobrang payat ng babae at parang isang ubo na lang, goodbye Urvularia na siya.

“Bili na kayo!” muli niyang sigaw.

Sa halip lumapit, mas lumayo pa ang mga ito.

“Ineng, hayaan mo na yan. Kumuha kana lang ng makakain mo,” mabait na sambit ng matandang may-ari ng stall, si Mang Isto.

Palagi siyang binibigyan nito ng prutas kaya kahit papaano tinutulungan niya ito.

“Mang Isto, ipagbubuhat na lang kita ng mga basket mamaya," pagpresenta niya sa matanda.

“Ayos lang Ineng. Ang mga babae hindi dapat nagbubuhat ng mabibigat. Kailangan mong pangalagaan ang iyong katawan ng sa ganun magkaroon kana ng nobyo.”

Napanguso siya sa sinabi nito. Parating ganun ang sinasabi sa kanya ng matanda.

“Salamat sa mansanas Mang Isto,” paalam niya habang hawak ang isang mansanas.

Kung magtatagal pa siya, siguradong marami pa itong sasabihin.

...

Umupo si Reyna sa paborito niyang tambayan. Isang pader na bakod ng pamilihan. Sumandal siya sa katabi nitong puno habang nakataas ang isang paa at nakapatong ang isang kamay. Sinimulan niyang kainin ang hawak na mansanas habang pinagmamasdan ang kumpol ng mga tao sa pamilihan. Kitang-kita rin niya ang mga kagrupo ni Maylo na dumidiskarte sa mga tao. Hindi muna siya magpapakita sa mga ito. Wanted pa siya sa grupo ni Maylo. Pinagpagan niya ang mga kamay ng maubos ang pagkain. Umagahan at tanghalian na niya ang mansanas na yun kaya't didiskarte na naman siya ng panghapunan. Mabuti pang magsimula na siyang maghanap ng makakain.

"Miss..." napatigil siya sa tangkang pagbaba ng pader. Kumunot ang noo niya ng makita ang tatlong pulis. "...Pwede ka ba namin imbitahan sa headquarters?"

"May pagkain ba ro'n?"

Nagtaka naman ang itsura ng pulis.

"Meron..."

"Tara na," putol niya sa sasabihin ng pulis.

Nagpatiuna pa siya sa paglalakad patungo sa sasakyan ng mga ito. Kahit nagtataka, sumunod na rin ang mga pulis. Akala nila mahihirapan pa silang kumbinsihin ito.

...

...

"Miss, kung ako sayo magsalita ka na," nawawalang pasensyang sabi ng pulis.

Masamang tiningnan ni Reyna ang pulis at hindi pa rin nagsasalita. Kanina pa siya nitong pinapaamin sa mga bagay na wala naman siyang alam.

"Miss, huwag mo nang pahirapan ang iyong sarili. Mababawasan ang sintensya mo kung aamin ka na ngayon. Tutal nasa Black District kana, hindi na rin magiging bago ang pamumuhay mo," sambit nitong muli.

Kanina pa nitong sinasabi na umamin na siya. Hindi naman niya alam ang aaminin niya.

"Kamusta? Nagsalita na ba?" tanong ng pulis na nag-imbita sa kanya sa headquarter.

"Hindi pa. Matigas ang pulubing ito ayaw kumanta," sagot ng pulis na kanina pa siyang pinapaamin.

"Miss, magsalita kana kung hindi mapipilitan kaming ilagay ka sa Dungeon."

"Wala akong sakit, bakit niyo ako ilalagay sa Dungeon? Sinabi mo lang kanina may pagkain dito kaya sumama ako, tapos pagdating ko dito papaaminin niyo ako sa bagay na hindi ko alam? Mamang pulis, nalipasan ba kayo ng gutom? Mukhang malulusog naman kayo ah," sambit niya habang nakatingin sa mauumbok nitong tiyan.

"Miss, iniinsulto mo ba kami? Baka ngayon pa lang malasap mo na ang sariwang hangin sa Dungeon," mayabang na sambit ng kaharap niyang pulis. Alam niyang kanina pa itong nauubusan ng pasensya sa kanya.

"Mamang pulis, mansanas lang ang kinain ko simula kanina. Inabala niyo ang paghahanap ko ng pagkain dahil sinabi niyo meron dito. Tapos sasabihin mo umamin na ako. Mukhang nalipasan ka talaga ng gutom o baka kumain ka ng expired? Pero hindi naman ako ganyan kahit kumain ng expired, sumasakit lang ang tiyan ko," inosenteng katwiran niya.

Hindi niya talaga maintindihan ang sinasabi nito sa kanya.

"Anong nangyayari dito?" naalerto naman ang dalawang pulis dahil sa boses na narinig.

Mabilis tumayo ang dalawa at sumaludo.

"Chief," sambit ng dalawa.

Lumingon si Reyna sa likuran para makita ang sinasabi nitong Chief, pero malamig na mga mata ang nakasalubong ng paningin niya. Binalewala niya ito at lumipat ang tingin sa maliit at mabilog nitong kasama. Parang nagliwanag ang kanyang mga mata.

"Siopao," natatakam niyang bulong.

"Anong nirereklamo nito?" nagtataka nitong tanong.

Nawala ang siopao sa paningin niya at napalitan ng isang maliit at matabang pulis.

"Chief, siya ang suspect sa nangyaring murder sa 7th street kagabi." Kumunot ang noo niya. Hindi dahil sa tinawag nitong Chief ang siopao kundi dahil sa sinabi nitong murder at siya ang suspect.

Ngayon nauunawaan na niya.

"Kaya pala kanina mo pa akong sinasabihan na umamin." Halata naman ang pamumutla ng pulis sa sinabi niya. Alam niya kung bakit ito namutla dahil pinapaamin siya nito nang hindi sinasabi ang dahilan. "Pinipilit mo akong umamin pero hindi mo sinasabi ang dahilan. Kumpirmado, nalipasan ka nga ng gutom mamang pulis."

"Ikaw ang nakita sa crime scene ngayong umaga. Malamang nakatulog ka dahil sa pagod at ang kamalian mo lang, sa mismong lugar ka natulog at hindi na nakalayo pa," mayabang nitong pahayag.

Naiiling na lang siya sa sinabi nito. Dinudungisan nito ang magandang reputasyon ng mga pulis.

"Isa ka bang manunulat, mamang pulis? Dapat wala ka sa Black District. Bawal ang kahit anong pahayagan dito, hindi mapapakinabangan ang talento mo."

"Huwag mong ilihis ang usapan. Hindi mo ako maililigaw. Paano mo maipapaliwanag ang natuyong dugo sa leeg mo?" matapang nitong tanong.

"Malamang nahiwa ng patalim," mahinahong sagot niya.

"Paano ka masusugatan kung hindi ka nakikipaglaban?" taas-noo nitong tanong.

Napahawak siya sa tiyan ng maramdaman niya ang pagkulo ng sikmura.

Nagugutom na talaga siya. Akala niya hindi na siya mahihirapan sa paghahanap ng pagkain kapag sumama siya sa mga ito, pero hindi man lang siya binigyan kahit kapirasong tinapay.

"Let me interrogate her." Napatingin sila sa lalaking nagsalita.

"Detective Xero, hindi mo na kailangan gawin yan. Kami na ang bahala sa kasong ito. Napakalaking abala na ang pagbisita mo dito sa Black District headquarter," nakangiting sambit ng Chief sa lalaki.

"I'll talk to her in private, Chief," sambit nito.

...

...

Bahagyang inalon ni Reyna ang kanyang katawan. Tumalbog ang kanyang pang-upo dahil sa lambot ng upuan. Hindi pa siya nakuntento at malakas na niyugyog ang katawan. Tuwang-tuwa siya dahil tumatalbog siya.

"Ehem." Tikhim ng kaharap niya.

Nakalimutan niyang may kasama nga pala siya. Nasa loob sila ng isang silid. Dito siya dinala ng mga pulis para makausap ng Detective daw na kaharap niya.

"Pasensya na, wala akong gamot sa ubo. Pagkain nga hirap ako, makabili pa kaya ng gamot. Mukha ka namang may pera, pacheck up kana lang," sambit niya dito at pinagpatuloy ang ginagawa.

"Tell me... what have you witnessed last night?"

"Paki-translate," sagot niya habang yumuyugyog pa rin sa upuan.

"Sabihin mo kung ano ang nakita mo kagabi." Marunong naman pala magtagalog pinahihirapan pa siya.

"Penge muna ng pagkain." Nakangiti niyang request. "Hindi ako nakakapag-isip ng maayos kapag nagugutom ako. Mas maganda ‘yong detalyado kong masabi sayo."

Hindi ito sumagot pero inangat ang telepono na nasa gilid lang ng mesa nito.

"Order some food," tipid nitong sabi bago binaba ang telepono.

Nakatingin lang si Reyna dito at ganun din ito sa kanya. Hindi naman niya inaalis ang tingin sa kaharap, kahit kumurap hindi niya ginagawa. Hindi siya magpapatalo. Kahit naluluha na ang kanyang mga mata. Hindi siya susuko. Nararamdaman niyang malapit na siyang manalo.

"Sir, ito na po ang pagkain." Kumurap ito bago tumingin sa bagong dating.

"Yahooo! Panalo!" masaya niyang sigaw.

Pumatong pa siya sa malambot na upuan at tumalon-talon doon.

"Kumurap ka. Panalo ako." masaya niyang sabi sa lalaking kaharap.

Hindi pa rin kumukupas ang galing niya sa patagalan kumurap.

"What are you saying?" alien nitong tanong sa kanya habang nakakunot noo.

"M-miss, huwag mong patungan ng paa ang upuan. B-baka madumihan.” Humarap siya sa nagsalita.

May mga bitbit itong box at inumin sa isang plastic. Sumusulyap rin ito sa direksyon ng lalaking kaharap niya tapos balik sa kanya. Mukhang kinakabahan rin ito.

"Pagkain ba yan?" masigla niyang tanong.

Nagmadali namang umalis si Reyna sa upuan. Sa backrest na siya sumampa para hindi na siya umikot kung sa harapan pa dadaan.

"Aray ko," muli niyang reklamo ng bumagsak siya sa sahig.

Naiwan kasi sa sandalan ang isa niyang paa kaya't hindi niya naibalanse ang katawan. Balewala naman siyang bumangon at lumapit sa lalaking may dala ng pagkain. Pigil pa ang ngiti nito habang nakatingin sa kanya.

"Leave it here." Lumingon naman siya sa lalaking kaharap kanina na ngayon ay nasa gilid na niya.

"Nag-migrate ka ba?" tanong niya dahil sa bilis nitong makalapit sa pwesto nila.

"Migrate? Hindi naman lumipat ng tirahan si Sir," sambit ng isa.

"Pero lumipat siya mula doon hanggang dito," paliwanag niya.

"Ahh!” nauunawaan nitong sabi habang tumatawa. "Teleport yun, pero hindi naman natin kaya magteleport," gulat siyang napatingin dito.

"Talaga? Nagbago na pala?"

Malakas na naman tumawa yung lalaki. Nalipasan din yata ng gutom.

"Corales, you may go." Nawala naman ang ngiti nito ng marinig ang boses nung Alien.

Nilapag nito ang mga dala sa isa pang mesa sa loob ng silid.

"Yes, Sir," paalam nito sa lalaki bago lumabas.

Nagtungo naman siya sa kinaroroonan ng mga pagkain.

"Ang dami." Parang nagningning ang mga mata niya dahil sa masasarap na pagkain sa mesa.

"Eat and tell me everything." Sa pagkakataong ‘yon, naunawaan niya ang alien nitong salita.