Chapter 31

Napabalikwas nang bangon si Father Mer. Sa tabi niya, ang kanyang Ate Isabel na nakahiga at nakatitig lang sa sapot ng gagamba malapit sa fluorescent lamp. Nasa living area na sila ng bahay na bihira lang tambayan. Sapin nila sa likod ang carpet na puno ng alikabok.

"Kanina pa siya hindi nagsasalita," si Minggay. "Father, may pitsel po ng malamig na tubig. Baka gusto niyo pong uminom."

"Lumayo ka sa amin! Mga kampon kayo ng kadiliman!"

Nasaktan si Minggay sa paratang na iyon ni Father Mer, pero hindi niya iyon pinahalata. Sa halip, kinuha niya ang basong nakapatong sa side table at nagbuhos doon ng malamig na tubig. "Father, inom po muna kayo."

Tinabig ni Father Mer ang baso at nabasag ito pagtama sa dingding. "Hindi ko kailangan ng tubig. Ang tanong ko ang sagutin mo. Ano 'yung mga nakita ko sa second floor? Sagot!"

Umupo si Minggay sa may sofa at nagsimula siyang mag-kuwento. Sinabi niya ang lahat-lahat sa pari. Mula noong utusan siya ng kanyang ina na nakawin ang korona ng mahal na