Kabanata 22

Blair Castro

INALALAYAN kong makababa ng kotse si Lira matapos kong mauna. Ngumiti ako sa kaniya saka nagpaalam. Isinasabay na rin kasi ako ni Lukas ngayong tanghali para makuha ko ang kotse ko at nang may masakyan ako mamayang hapon.

Tiningnan ko si Lukas nang bigla niyang inihagis sa akin ang susi ng kotse ni kuya nang walang paalam. Sumimangot ako pero hindi niya ako pinansin.

Tumalikod na siya kasama si Lira at pumasok sa bahay nila. Umismid naman ako at tumawid na sa kabilang kalsada. Hindi na ako pumasok sa bahay. Agad akong sumakay sa kotse at nagmaneho paalis. Sa karinderya nalang ako kakain dahil matatagalan ako kapag nagluto pa.

Agad rin akong bumalik sa school matapos kong kumain ng pananghalian. Maayos ang naging takbo ng araw ko at masaya naman ako sa nangyari ngayon. Nakasama ko si Lira at feeling ko ay saglit akong naging nanay sa kaniya.