KABANATA 111

Kanina pa siya hindi mapakali. Kulang na lang ay hilain niya ang oras. Kasama niya ang Mama niya pati na si Jethro sa airport. Ngayon kasi darating ang lola at ang mga anak niya. Hindi niya inaalis ang mga mata sa bukana kung saan dumadaan ang mga pasahero.

Hindi niya maintindihan ang nararamdaman nang makita ang lola niya na hawak sa magkabilang kamay ang kambal niya. Mabilis na tumakbo siya papalapit sa mga ito habang panay ang kaway para mapansin siya. Ilang buwan pa lang naman mula nang huli niyang nakita ang mga ito pero pakiramdam niya ay ilang taon na silang nagkahiwalay.

Lumiwanag agad ang mukha ng dalawang anak nang makita siya.

"Mommy!" Sabay na sigaw ng mga ito na palundag-lundag pa. 

Kahit alam niyang gusto na ng mga anak na tumakbo palapit sa kanya ay hindi nito binitiwan at iniwan ang lola nila. Mabilis na niyakap niya ang lola saka nagmano rito at hinalikan sa pisngi nang tuluyan nang makalapit sa mga ito. Pagkatapos ay yumuko siya