(S3) 58. SETTLE 2

TRACE

Five days had passed. Sa limang araw na lumipas ay wala na yata akong ginawa kung hindi ang pumunta ng ospital at silipin ang asawa ko at tingnan ang lagay ni Prime. Sa tatlong araw ay pride na lang ang pinapairal ko para hindi lapitan si Chloe at kausapin.

Hindi pa kami nagpapang-abot ni Alguien dahil sinasadya ko na pumunta roon kapag kakaalis niya lang. Hindi ko gustong magkagulo kami sa loob ng ospital at sa kalagayan ko ngayon ay si Alguien ang papanigan ni Chloe. Kahit hindi ko ugali ang umatras sa gulo ay para kay Chloe gagawin ko.

Napabuga na lang ako ng hangin sa asar habang patuloy na nagmaneho patungo sa pupuntahan ko. Sa ngayon ay si Zeno lang ang naniniwala sa akin at tumutulong na rin para makapunta ako ng ospital kapag umalis na roon si Alguien. At kagabi ay may sinabi si Zeno sa akin, gusto na raw akong makausap ni Alguien, at puntahan ko sa Sacre Bleu ngayong umaga.

Sacre Bleu. Ang hotel ni Matthias Ivanov, na ginawa ring kuta ni Alguien ang ilang palapag.