Chapter 24. Lukas Buenaventura

Nagpatawag si Vladimir ng meeting sa kumpanya upang ibalita sa lahat ang bagong posisyon ni Lyka sa kumpanya bilang Presidente. Marami ang bumati ngunit marami rin ang nag bulong-bulungan tungkol sa kanyang bagong posisyon dahil alam naman ng mga ito na nobya siya ni Henry kaya niya nakuha ang posisyon.

Nagalit si Vladimir sa kanyang mga narinig, “Kung meron man kayong nais sabihin ay magsalita kayo!”

Tumahimik ang lahat sa pagsasalita ni Vladimir. Walang nais magsalita, kung ano ang takot nila sa ama nito ay siya ring takot nila kay Vladimir bilang bagong may-ari ng kumpanya.

“Kung sino man sa tingin ninyo ang mas nararapat sa posisyon ni Miss Lyka ay sabihin ninyo kung sino,” sabi ni Vladimir.

“But I’m sure na walang sino man sa inyo na kayang tapatan ang angkin niyang galing sa trabaho. Gawin nyo na lang ang inyong mga trabaho ng tama para naman hindi nasasayang yung pinapasahod sa inyo ng kumpanya.” Matalim ang tingin ni Vladimir sa lahat lalo na sa mga nagbubulungan kanina lang.