KABANATA 32

“SIGURADO ka na ba dito Devina? Paano kung umasa ka lang at hindi naman pala iyon totoo?”

“Wala akong pakialam Jeydon. Gusto ko ay makakuha ng impormasyon, o kung siya ba talaga si Arabelle.”

Rinig ko ang buntong hininga ni Jeydon habang nagmamaneho. Hindi ako nagdalawang isip na puntahan ang address na ibinigay saakin ng private investigator ko. Maya-maya pa ay huminto kami sa isang orphanage at napakaraming bata sa labas ng bahay na iyon.

“May mag-aampon!”

“Sabihin niyo kay sister bilis!”

“Hello po!”

Hindi ko maiwasan na mapangiti dahil sa sobrang bibo nila. Nakikita ko na gusto na nilang magkaroon ng pamilya, pamilya na tatratuhin sila na totoong pamilya. Bigla akong nalungkot dahil doon.

“Hello there kids, gusto lang namin makausap ang namumuno sa orphanage na ito. Pwede ba namin siyang makausap?” Ngiting tanong ni Jeydon sa mga ito.

“Opo! Dito po tayo!”

Hinila kami ng mga ito papasok sa loob at maya-maya pa’y nakita namin ang nasa limang sister at hinarap kami.