Chapter 19

NAALIMPUNGATAN siya ng maramdaman  ang sunod-sunod na pagkalabit sa kanya.

" Hoy, Camilla, gising! Grabe ka naman matulog, nakanganga ka pa, tinuluan mo na yata ng laway 'yang sandalan ng kotse ko,eh." Rinig niyang reklamo pa ng lalaki.

Papungas-pungas siya ng imulat ang mata at naiiritang tumingin sa lalaki.

" Saang marathon ka ba galing at mukhang pagod na pagod ka?" nakangisi nitong tanong.

Hindi niya ito sinagot at lumabas na siya ng kotse. Ngunit nagulat siya dahil nasa isang mall sila.

" Anong ginagawa natin dito?"

" Tumawag kasi si Athena, nagpapabili ng pagkain."

" Eh, bakit mo pa ako ginising, hindi mo ba kayang bumili mag-isa?" nanlalaki ang mata niyang singhal dito.

" Sinabi ko bang sumama ka? Ginising lang kita para sabihan ka," anito na bahagya pang lumayo sa kaniya.

Nagmumukha na naman kasi siyang dragon sa galit. Inis siyang nagkamot ng ulo at muling pumasok sa loob. Muli siyang pumwesto para matulog.

" Ayaw mo ba talagang sumama?" dinig pa niyang tanong ng binata.

" Ayoko!" asik niya dito.

Naramdaman niya ang paglayo nito. Kung bakit naman kasi hindi siya nakatulog kagabi sa kakaisip sa kinakaharap nilang problema ng kaibigan. Maya-maya ay napamulat siya ng maisip iyon. Bakit nga ba tila kampante siyang natutulog na lang samantalang ang kaibigan ay natutuliro na sa kakaisip. Tinanaw niya ang lalaki na ngayon ay hindi niya na makita, maganda sanang pagkakataong ito para sa pagpapanggap nila. Napalinga-linga siya sa paligid,wala namang kakaiba kung sino man ang maaring nakasunod sa kanila. Muli siyang napahikab at sumandal sa kotse.

Kalahating oras din siyang naghintay ngunit wala pa rin ang lalaki kaya naman naisipan niya na lang itong sundan. Una niyang pinuntahan ang supermarket ngunit wala roon ang lalaki. Inisa-isa niya rin ang mga fastfood chain nagbabaka sakaling nagtake-out na lang ito ng food ngunit bigo pa rin siya. 

" Saan ba siya nagpunta?!" gigil niyang usal sa sarili.

Umaangat na ang dugo niya sa ulo sa sobrang inis sa lalaki. Nagagawa pa kasi nitong mamasyal sa kabila ng kinakaharap nitong problema. Nang mapagod ay nagpasya na lang siyang  bumalik sa parking lot baka kasi nagkasalisihan sila ng lalaki. Ngunit agad niya itong nasulyapan sa gilid ng mall sa  isang bakanteng lote. May kausap itong sexy at magandang babae. Lumarawan agad ang inis sa kaniyang mukha.

" Darling!" sigaw niya na nagpalingon sa dalawa.

Napawi naman agad ang ngiti sa mukha ni Damon ng makitang papalapit siya na anumang oras ay bubuga na yata ng apoy.

" Ano ka ba naman, Darling ko kanina pa ko hanap ng hanap sa'yo, nandito ka lang pala at nakikipag landian?" malambing niyang wika ngunit nakapingot naman  sa tenga ng lalaki.

Nanlaki naman ang mata ng babaeng kaharap sa ginawa niya.

" Ouch, hey! Stop it!" hiyaw ni Damon.

" Masakit ba, Darling? Alam mo bang inikot ko na ang buong mall para hanapin ka tapos nandito ka lang pala nakikipagharutan!?" aniya at binitawan ang namumulang tenga ng lalaki.

" Wait, Damon? Is she your girlfriend?" Tila hindi makapaniwalang tanong ng babae.

" Oo, bakit hindi ba obvious? Ayan,oh, Darling pa ang  tawagan namin, 'di ba Darling?" Kinawing pa ang braso sa braso ng lalaki.

Hindi na sumagot ang babae, tumaas lang ang kilay nito at pinagmasdan siya mula ulo hanggang paa.

" So, Damon, mahilig ka na pala sa mga bansot  ngayon?" mataray na tanong ng babae.

Napaawang ang bibig niya na tila hindi makapaniwala sa narinig.  Magsasalita na sana siya ng takpan ni Damon ang bibig niya at hinila na siya.

" Sige, love, next time na lang,ah?!" paalam pa nito sa babae.

Nagpumiglas siya ngunit sadyang malakas ang lalaki. Halos buhatin na siya nito para lang mailayo. Saka lang siya binitawan ng lalaki ng makalayo na sila. 

" Hoy, ikaw Damon, ah! Wala ka talagang respeto sa bestfriend ko, nagawa mo pang lumandi sa iba kahit kasama mo ako?! Ni hindi ka man lang natakot na baka magsumbong ako, sumosobra ka na!" gigil niyang singhal dito.

" Teka nga, kumalma ka nga muna. Hindi ako nakikipaglandian, kaibigan ko lang 'yun, tropa."

" Kaibigan? E, love nga tawag mo sa kaniya,eh! Hindi ako tanga at bingi ' no!" 

Gusto niya na itong sapakin ngunit pilit naman itong lumalayo sa kaniya. Para siyang girlfriend nito na totoong nagseselos. Nagseselos nga siya ngunit hindi para sa sarili kundi para sa kaibigan.

" Syempre, Lovely ang pangalan niya. Natural love ang tawag ko!" 

" Sinungaling! Hay,ewan ko ba kung ano nagustuhan sa'yo ng kaibigan ko! Naku, sumasakit ang ulo ko!" 

" Dahil pogi ako?" pagbibirong tugon naman ng lalaki.

Natawa siya ng pagak at pinili na lang na tumalikod upang bumalik na sa kotse. Pakiramdam niya kasi ay maloloka na siya habang kausap ito. Ngunit panayan pa rin ang dakdak niya habang naglalakad habang si Damon naman ay ginagaya siya sa pagbubunganga, minsan ay tinatakpan nito ang sariling tenga  na tila naririndi na sa kaniya. Narinig pa niya itong sumisipol habang sinesermunan niya. 

" Sana sa oras na 'to mahimbing na akong natutulog sa bahay! Pero heto ako daig pa ang may alagang aso! Naku, ang sakit ng ulo ko, highblood na yata ako. Juskolord, ano ba 'tong pinasok ko?Kunin niyo na po ako!" hiyaw pa niya.

Gusto niya ng mawalan ng ulirat dahil sa pagod at matinding antok. Nauuhaw pa siya kaya naisipan niyang tanungin ang lalaki kung bumili man lang ba ito ng inumin. Ngunit paglingon niya, wala siyang Damon na nakita.

" Damon, saan ka na naman ba nagpunta?!" gigil niyang saad sa sarili.

Nagpalinga-linga siya sa paligid at namataan niya nga ito sa 'di kalayuan na may kausap na namang babae. Umakyat ang dugo niya sa bumbunan at nagngalit ang kaniyang mga ngipin. 

" Damon!!" sigaw niya habang patakbong sumugod dito.

Lumipad siya sa ere at iniunat ang paa papunta sa mukha ng binata. Hindi niya na alintana ang mga tao sa  paligid. Nanlalaki naman ang mata ni Damon habang tulalang nakatanaw na lang sa paa niya na tumama  mismo sa mukha nito. Hindi ito nakaiwas dahil sa gulat at pareho pa silang bumagsak sa lupa. Gulat na gulat naman ang babaeng kausap ng binata na agad itong dinaluhan.

Nagkaroon ng malaking pasa ang lalaki sa mismong mata pa nito. Ibig niyang matawa habang dinadampian ito ng yelo ni Athena.

" Ouch, dahan-dahan lang, Hon!" d***g ng binata.

" Sus, parang bakla! Laki-laking tao,eh, lampa!" bulong pa niya.

Narinig niya ang pagbuntong hininga ng kaibigan.

" Ano na naman ba  kasing nangyari sa inyong dalawa? Para kayong mga bata!" naiinis na turan ni Athena.

" Yan kasing boyfriend mo,eh, kaliwa't kanang babae ang nilalandi kanina!"

Mabilis namang tumanggi si Damon sa paratang niya.

" Remember, Lovely 'yung tropa natin? Ayaw niyang maniwala na kaibigan natin 'yun!"

" Palusot ng mga dakilang playboy!" 

" Kung ayaw mong maniwala 'di 'wag. Hayy, ewan ko dyan sa kaibigan mo, hon, natanong mo na ba si Tita kung saan pinaglihi iyan? Parang kabayo kung makasipa!"

" Eh, ikaw saan ka pinaglihi,ha? Sa higad? Napaka kati mo kasi,para kang karinderyang bukas sa lahat ng gustong kumain!"nandidilat ang matang singhal  niya.

Humagalpak ng tawa si Damon sa nakikita nitong expression ng mukha niya.

" Okay, enough!" awat ni Athena sa kanila. " Let's forget what happen kanina. Meron tayong mas malaking problema na kinakaharap!" 

Kapwa sila natahimik na parang mga bata.

" Mukha kasing may alam na si Mommy and i really don't know how to solve it!"

" Sabihin na kasi natin ang totoo,hindi habang buhay maitatago natin sa parents mo ang katotohanan,"bigla ay seryosong wika ni Damon.

" And then what? Ihihiwalay ka lang niya sa akin at ipapadala niya ako sa Amerika!" puno ng tensyong tugon ni Athena.

" Hindi kaya nag o-overthink ka lang, Bes? Baka naman kasi may ibang sasabihin lang ang Mommy mo."

" She's right, Hon.  After all, ginawa naman natin ng maayos ang plano  and i don't think na nalaman na nila ang totoo. So, please just calm down?" pagpapahinahon ni Damon sa nobya.

Saglit na natahimik si Athena na mukhang kumalma naman. Nagpasya muna siyang iwan ang mga ito para makapag-usap na muna ng maayos ang dalawa. Nagpahangin muna  siya sa labas ng may mamataan siyang bulto ng lalaki sa madilim na bahagi ng resthouse. Lumapit ito sa kaniya at nakangiti pa. 

" Mico? Anong ginagawa mo rito? Paano mong?" 

" Sumunod ako sa inyo," nakangiting tugon nito. "I won't let Damon na masolo ka." 

Matapos ay hinawakan siya nito sa kamay. Gumaan agad ang pakiramdam niya sa ngiting iyon ng nobyo. 

" Loko ka talaga!" 

Naupo sila sa okupadong upuan sac terrace ng resthouse. Humilig siya sa balikat ng lalaki habang magkahawak ang kamay nila.

" Napagod ka sa pambubugbog mo kay Damon 'no?"

Napaangat siya ng tingin  rito.

" Nakita mo 'yun?"

" Oo, naman. Pati na 'yung flying kick mo," nangingiti pa rin nitong tugon.

Napahalakhak siya ng malakas dahil doon. 

" Ang siga talaga ng girlfriend ko, kaya mahal na mahal kita,eh!"

" Sus! Hindi ka natatakot sa akin?" pabiro niyang tanong.

" Hmm, medyo. Kaso may isang eksena lang ako na hindi nagustuhan. 'Yung tinawag mo siyang Darling and you put your arms to him," tila nagtatampong turan pa nito.

" Naku,nagselos ka na naman!" Pinisil niya ang ilong nito at muling humilig sa balikat nito.

Naramdaman niya ang paghalik nito sa kaniyang buhok.

" I love so much, Babe," bulong pa nito.

Napangiti siya dahil doon at pumikit. Tila nakahanap siya ng masasandalan sa pagod niyang isip at katawan.  

" Guess what? Alam mo bang nakausap ko na ulit sina Mommy?"maya-maya ay wika na may kasabikan sa boses.

Muli siyang napatunghay sa lalaki.

" Ni-refer ka na nila sa family friend namin na sinasabi ko sa'yo na nagmamay-ari ng restaurant?"

Napatitig siya sa nobyo, hinihintay ang sunod nitong sasabihin.

" They're  willing to accept you!"

Halos maluha siya sa magandang balita na iyon ng nobyo. Niyakap niya ito sa sobrang katuwaan.

" Salamat, Babe!" naluluha niyang sabi.

Masaya rin siyang ginantihan ng yakap ng nobyo. 

" After nating maka-graduate isasama na kita kaagad doon." 

Napatango-tango naman siya sa sinabing iyon ng nobyo. Pinahid niya ang luha  na naglandas sa pisngi niya sa sobrang katuwaan.

" So, nasaan ang reward ko?" pilyo ang ngiting tanong nito matapos nilang kumalas sa pagkakayakap.

" Anong reward ba ang gusto mo?" ngumiti siya ng pilya.

Imbis na sumagot ay agad siyang siniil ng mainit na halik ng nobyo na ginantihan niya rin naman. Naging maalab ang halik nila sa isa't-isa ng may bulto ng tao ang napahinto ng makita sila sa ganoong ayos.

" Opps!" 

Narinig niyang sambit na walang iba kundi si  Damon. Nagulat pa siya ng makita ito. Agad siyang tumayo at inayos ang sarili. Nakalimutan niya, hindi nga lang pala sila ang tao sa lugar na iyon. Kasunod nito si Athena  na laking pasalamat niya ay hindi ito ang nakakita dahil kalalabas lang din nito.

" Nandito ka pala, Mico. Kanina ka pa?" tanong ni Athena sa binata.

" Ah, oo, medyo kararating ko lang."

Tumango lang ng matamlay si Athena at nagsimula ng maglakad para lisan ang lugar na iyon. Sumunod na rin sila ngunit sa kotse na ni Mico siya sumakay.