CHAPTER 34

"Ang swerte mo nga, eh. Kahit wala kang gawin ay mahal ka talaga ni Grantt. Kahit anong tulak mo sa kanya papalayo sa'yo ay mahal na mahal ka pa rin niya. Segu-segundo kong ipinagdarasal na sana ay ako na lang ikaw. Kapag nangyari iyon ay hinding-hindi ko sasaktan si Grantt ng ganyan."

Pareho kaming napatingin kay Grantt. Nagkasalubong pa ang aming tingin. Marahil ay kanina pa siya nakatitig sa akin.

"Sana man lang makita kong deserving kang mahalin ni Grantt pero hindi, eh. Sinasaktan mo lang siya," rinig kong himutok ng babae.

"Hindi mo alam ang kwento namin..."

"What if alam ko? Hindi ba at si Greel Gomez dapat ang mapapangasawa mo at hindi ni Grantt?"

Nabaling ang atensiyon ko sa babae. "Paano mo nalaman?"

"Just someone told me," tugon nito sabay iwas ng tingin sa akin at pinakatitigan si Grantt.

Tumayo siya at lumapit sa akin. Napansin kong gano'n din ang ginawa ni Kenth. May balak na naman yatang magsabong ang dalawa sa harap ko.

"Ihahatid na kita, Yong," sabay pa nilang sabi.