Chapter 31-Kaguluhan

Matapos makapagbihis ay hirap na inayos ni Joseph ang necktie. Sanay naman siyang magsuot na ganoon, pero kasi— "ayst, sir, baka puwedeng siya na lang ang pagsuutin mo ng iyong damit?" nagrereklamong pakiusap niya sa binata.

Gustong matawa ni Jomar sa bagong kaibigan. Ito ang ipinadala ni Cyrus sa restaurant kung saan sila kumakain madalas ni Travis. Paano naman kasi, malaki kay Joseph ang full sleeve at trouser.

"Mas maliit si Jomar."

Nakamot si Jomar sa kaniyang batok. Kailangan pa ba talagang sabihin ang kaniyang height at size? Kahit maliit siya ay maliksi naman kaya nga naging undercover din siya ng isang detective.

"Ayos lang po ba kayo diyan sa suot niyo?" Biglang nag-alala si Joseph at baka may kakaibang amoy ang kaniyang damit na suot ngayon ni Travis. Mabuti na lang at mahilig siyang magsuot ng oversized t-shirt at pantalon. Isa pa ay iyan ang uso ngayon.

Sinuri muli ni Travis ang sariling reflection sa salamin. Naroon silang tatlo ngayon sa restroom at nagpalit ng kasuutan.