Chapter 36

Xyrica’s POV:

Nakababa na kami galing sa room ni King at tinanong ako ni Cyborg kung ano ang gagawin namin. Pumasok muna kami sa loob ng kwarto ko at nag-check sa voice recorder na ballpen, mukhang wala namang nangyari rito sa loob habang wala ako kaya kampanti kong masasabi sa kanya ang plano ko.

“I want us to go back,” sabi ko.

“Saan?” Tanong ni Cyborg.

“Alam mo na kung saan,” sabi ko tapos tinignan ang box na galing sa Angelica Tree building.

Umupo muna si Cyborg sa kama ko at sinabing, “Pero maaga pa naman para diyan. Paano kung may makakita sa atin ngayon?”

“Ito lang kasi ang panahon na naiisip ko para bumalik doon. Alam mo namang ilang araw din tayong hindi nakabalik kasi palaging nasa tabi ko sina Michiaki,” sabi ko.