Chapter 6

UMIIKOT ang mundo ni Khevin Tolentino sa pagpapatakbo ng negosyong ipinamana sa kanila ng kanilang mga magulang. Lima silang magkakapatid at walang hilig sa negosyo ang apat niyang mga kapatid na may kani-kaniya ng buhay sa abroad at matagumpay na din sa larangan ng mga piniling propesyon at career. Naiwan sa kaniya ang pamamahala sa naglalakihang Hotels sa Baguio at ilang Travelling Agency na nasa iba't ibang panig ng bansa.

"Kuya, uuwi lang ako kapag ikakasal ka na." Ani Scarlet sa kabilang-linya, fashion-designer sa New York ang bunso nilang kapatid.

"Soon," naiinis niyang sagot. Palibhasa may asawa na ang dalawang sumunod sa kaniya at kapwa-may mga anak na. Sa edad niyang beinte-nuebe, ano nga ba ang inaasahan ng pamilya niya kundi lumagay na sa tahimik?

"Magpropose ka na kasi kay Cassandra." Umikot ang eyeball nito saka itinaas ang hawak na kopita ng champaigne.

"Ang aga mong mag-alak, Scarlet!" Sita ni Khevin, over-protective silang lahat sa nag-iisang Princesa ng mga Tolentino. Tumawa lang si Scarlet.

"Kuya Khevin naman, hindi na ako teen-ager! Baka nga mauna pa akong mag-asawa sa'yo." Nakangiti nitong biro. "Ano? Kelan ka magpu-propose kay Cassandra?"

Natigilan si Khevin, ni minsan hindi sumagi sa isip niya na pakasalan ang long-time girlfriend na si Cassandra Monteverde, isang sikat na supermodel na may naglalakihan ng billboard sa kahabaan ng Edsa, endorser ng mga branded clothes at sapatos, LDR sila ni Cassey at bihira ang komunikasyon dahil nga pareho silang busy sa trabaho.

"No! Hindi ka pa pwedeng mag-asawa, bunso! At wala pa rin naman ako planong mag-asawa."

Napahalakhak si Scarlet, pero natigilan nang makita ang babaeng nakatayo malapit sa pinto ng silid ng kuya nito. Kumunot ang noo ni Khevin, nilingon ang tinitingnan nito. Si Agatha.

"Who is she?" Tanong ni Scarlet.

"Hindi ka ba marunong kumatok man lang?" asik nito sa katulong, mabilis naman itong nakalapit at tumingin kay Scarlet na kasalukuyang ka-videocall ni Khevin.

"Hi Ma'am! Artista ka po?! Ang ganda-ganda mo naman!" Ang luwang ng ngiti ni Agatha.

"Oh, hi! Sino ka?" Nagtatakang tanong ng dalaga.

"Agatha!" Gigil na sita ni Khevin sa katulong na tila manhid na yata sa galit niya. "Maid ko!" baling nito kay Scarlet na napapantastikuhan. Pansin agad nito na hindi nito gusto ang babae.

"No, it's alright Kuya. Wow! Ang pretty ng maid mo. Sigurado ka bang katulong mo siya?" Hindi makapaniwalang tanong ni Scarlet.

"Iwan mo na ako." asik ni Khevin kay Agatha.

"Mamaya na Sir, nag-uusap pa kami ni Ma'am-"

"Scarlet ang name ko!" sagot ng kapatid ni Khevin na naaaliw sa reaksyon ng kuya niya na halatang naiinis kay Agatha.

"Ang ganda mo Ma'am Scarlet," saad ni Agatha. Tila mabilis naman niyang nakuha ang loob ni Scarlet na napangiti pa.

"Thank you!"

"Tapos na ba kayong mag-usap? Magpapahinga na ako." Inis na tanong ni Khevin.

"Matagal ka na bang maid ng kuya Khevin?" Hindi nito pinansin ang kuya Khevin niya, mas interesado na siyang makilala ang magandang katulong.

Tila komportable namang umupo si Agatha malapit kay Khevin at handang makipagkwentuhan ng matagal sa kapatid nito. Napahagikgik si Scarlet nang makitang dumistansya rito ang kuya niya.

"Five months na ako dito, Ma'am Scarlet. Alam mo Ma'am buti ka pa mabait." Humagikgik pa si Agatha. Natawa naman ang kausap nito. Nanlaki ang mga mata ni Khevin at gigil na tinapunan ng masamang-tingin si Agatha. Nakagat nito ang pang-ibabang labi na pasimpleng nagpalutang ng dimples nito.

"Talaga, bakit masungit ba ang Kuya Khevin ko?" Tanong ni Scarlet.

Tumingin muna si Agatha sa binatang Boss saka tumango habang impit na humahagikgik. Inis na tumayo si Khevin at tumalikod. Nakakagigil talaga si Agatha, aniya sa isip. Akalain niya bang nagawa pa nitong kaibiganin ang kapatid niya?

Bumaba si Khevin sa ikalawang palapag ng Mansyon, at nang masalubong si Aling Lydia ibinilin niyang kunin ang cellphone. Magpapalipas muna siya ng inis sa hardin.