Chapter 3

Pasukan na at halos hindi magkamayaw ang mga estudyante sa paghahanap ng mga silid nila para sa unang araw ng klase. Ang iba naman ay masayang nakikipag-kwentuhan sa mga kaibigan baon ang mga ginawa noong summer break.

Napalingon ang lahat at nagsimula ng mag-bulungan nang dumaan ang mga varsity players. Ang iba naman ay impit na napapatili habang tinitignan ang mga grupo ng kalalakihan.

"Cayden, hindi kaya mabali iyang ulo mo sa kakahagilap kay Kellissa. Baka naman kasi wala pa o kaya nasa building na ng department nila." asar ng isa sa mga ka-teammate ni Cayden kaya sinamaan ng tingin ng binata ang kaibigan.

"Siraulo!" singhal na saad ng binata kaya nagsi-tawanan at nag-apiran ang mga kasama niya.

"Captain! Ayun na si Kellissa na love of your life oh! Kasama si Zuri!"

Napalingon naman agad ang binata sa tinuturo ng kaibigan niya kaya agad siyang napasulyap sa kabilang parte ng corridor. Ganoon na lang ang pag-talon ng puso ni Cayden nang masilayan ang dalaga na nakangiting nakikipag-kwentuhan sa kaibigan nitong si Zuri.

Mabilis ang mga naging hakbang niya at nilapitan ang dalaga. Rinig naman ang impit na pagtili ng iba dahil sa nasasaksihan na eksena.

"Hi, Kellissa." nakangiting bati niya sa dalaga na agad din naman sinuklian ni Kellissa ng matamis na ngiti.

"Hello, Cayden. Kumusta?"

Para naman sinisilihan ang tiyan ng binata at nahihiyang napakamot sa batok.

"Ayos lang. Ikaw, kumusta na? Hindi kita nakikita sa inyo nitong nakaraang linggo." sabi ng binata at napansin niya ang pag-pula ng pisngi ng dalaga.

"Busy kasi ako sa pagtulong kay Mama sa mga trabaho atsaka sa pagba-bantay sa mga kapatid ko. Bakit ka nga pala nadaan sa bahay? May kailangan ka ba?" tanong ng dalaga kay Cayden.

"Wala naman... Ano kasi..." hindi malaman ni Cayden kung saan sisimulan ang sasabihin dahil nahihiya siyang aminin ka Kellissa na nadadaan lang naman siya sa bahay nito para lang masilayan siya.

"Kellissa, gusto kang yayain ni Captain ng date." singit ng kaibigan ni Cayden na si Mariano kaya nag-hiyawan ang mga kasama nila.

Inalog naman ni Zuri si Kellissa sa sobrang kilig kaya lalong namula ang mukha ng dalaga sa sobrang hiya. Ramdam din niya ang pagkabog ng dibdib niya ng dahil doon.

Alam niyang hindi na lang simpleng atraksyon ang nararamdaman niya para sa lalaki ngunit kailangan niya pa rin pigilan iyon. Mas gusto ng dalaga na mag-pokus sa pag-aaral dahil desidido siyang makatulong sa ina at mga kapatid.

"Kellissa, pwede ba kita mayaya sa bayan bukas? Kung pwede ka sana." tanong sa kanya ni Cayden at halos nakatingin na sa kanila lahat ng mga estudyante.

Hindi alam ng dalaga kung anong gagawin dahil para siyang natuod sa kinatatayuan. Matagal ng nanliligaw ang binata ngunit kahit kailan ay hindi niya pinaunlakan itong i-date siya.

Masama ba kung papayag siyang buksan ang puso para sa binata? Napatingin si Kellissa sa mga mata ni Cayden at kita niya ang pilit na ngiti nito.

"Ayos lang kung busy ka at hindi ka pa pwede ma-"

"Pwede naman ako sa Biyernes ng hapon. Ayos lang ba sa iyo?" putol niya sa sasabihin ng binata kaya lalong lumakas ang tudyo ng mga kaibigan ng dalawa.

Lumawak naman ang ngiti ni Cayden at kulang na lang ay mapatalon ang binata sa tuwa.

"Mauna na kami ni Zuri ha? Baka kasi mahuli kami sa klase." wika ni Kellissa habang nakapaskil ang ngiti sa kanyang mga labi.

"Sige. Ingat kayo." sabi nito na parang lutang pa rin kaya natawa ang dalaga sa itsura at inaasta ng binata.

"Ingat din." nakangiting saad niya at hinatak na ang kaibigang si Zuri paalis doon.

"OMG! Friend! Magkaka-boyfriend ka na! Finally! Matutuloy na ang love story ng favorite love team sa campus!" impit na tili ni Zuri kaya sinaway agad siya ni Kellissa.

"Adik! Pumayag lang makipag-date, boyfriend na agad? Hindi ba sinabi ko na sa iyo na wala pa akong balak mag-nobyo dahil baka maapektuhan ang scholarship ko. Ayaw ko naman umasa sa ama namin at baka maisumbat lang sa amin ng kabit niya." nakangiwing wika ni Kellissa kaya napahalukipkip si Zuri habang papanhik sila sa unang klase nila.

"Hello! Iyong madrasta mo na tatlong guhit ang kapal ng kilay, dapat sa kanya sinasabunutan at ng maalog naman ang utak! Ang yabang-yabang porket mas may kaya kaysa kay Tita eh naging kabit lang naman. Hmp."  asik ng kaibigan kaya napakibit-balikat na lang si Kellissa.

"Wala naman akong magagawa, Zuri. Masyado rin mabait si Mama kaya kinakaya-kaya lang siya ni Uriella pati na din ng pamilya ni Papa." malungkot na sabi ng dalaga sa kaibigan.

"Hay! Hayaan mo silang mabulok sa impyerno at may araw din ang mga taong iyan. Akala mo mga pinagpala, mga batak lang naman sa botoks."

Natawa na lang si Kellissa habang papasok sila ni Zuri sa room. Binati naman sila agad ng mga ka-block nila nang makita sila. Ang mga kalalakihan naman ay halata ang admirasyon para sa magkaibigan.

Bukod kasi sa parehong maganda sina Zuri at Kellissa, sikat din ang dalawang dalaga sa campus. Si Zuri ay madalas na ume-ekstra sa mga commercial at pelikula samantalang si Kellissa naman ay laging ipinambabato sa mga academic competition sa iba't ibang unibersidad at national competition.

"Kelli, samahan mo naman ako mamaya. Kailangan ko bumili ng bagong damit para sa commercial na in-offer sa akin. Libre ko na pagkain at pamasahe mo, please?" nagpapa-cute pa si Zuri kaya natawa na si Kellissa.

"Oo na. Para naman hahayaan mo akong makatanggi." nakangiting sagot ni Kellissa kaya niyakap siya ni Zuri sa braso at nag-lambing.

"Syempre! Hindi mo ko matitiis eh. Kaya love na love kita! Tayo na lang kaya ang mag-jowa?" tinaas baba pa ni Zuri ang kilay kaya napahagikgik si Kellissa.

"Alam kong pretty ka pero hindi tayo talo, Zuri. Hindi ka mabubuhay ng wala kang bagong crush na lalaki sa campus." biro ni Kellissa kaya napanguso si Zuri.

"Guilty naman talaga ako sa madami akong crush. Girl! Paano ba naman kasi! Ang dami naman na cutie sa paligid pero ikaw hindi mo napapansin. Buti na lang biniyayaan ako ni Papa Lord na i-appreciate lahat ng ginawa niyang lalaki na cutie." natatawang sabi ni Zuri kaya pareho silang natawa na magkaibigan.

Ilang saglit pa ay dumating na ang professor nila at isa-isa na silang tinawag para sa attendance. Nang matapos ang kanilang mga klase sa buong araw ay sinamahan ni Kellissa ang kaibigang si Zuri sa mall.

Pagkatapos nilang makapag-ikot ay inabot na sila ng alas otso ng gabi bago makauwi. Nang makarating sila sa kanto ay nag-hiwalay na sila at nauna ng dumiretso si Kellissa sa lugar nila dahil may dadaanan pa ang kaibigan nitong si Zuri.

Nang makarating sa bahay ay rinig niya na nagtatalo ang ina at ama sa sala habang ang mga kapatid naman niya ay wala pati na din ang bunsong kapatid.

"Ang kapal ng mukha mo Rio! Sa loob ng ilang taon na panloloko mo sa akin, ikaw pa ang may ganang magalit?! Bakit hindi iyong kabit mo ang pagsabihan mo? Bakit niya kailangan saktan ang anak ko?! Siya ba ang nag-ire at nagpalaki ha? Ang kapal ng mukha niyo!" galit na sigaw ng ina ni Kellissa kaya napalapit siya sa pwesto ng mga magulang niya.

Hinawakan ng dalaga sa beywang ang ina habang nilalayo sa ama niya.

"Si Kendy ang may mali! Bakit hindi mo kaya disiplinahin ang mga anak natin ng maayos nang hindi lumalaking sutil?! Palibhasa ay laging naba-barkada ang anak mo na iyon kaya nagiging ganoon ang ugali!" sigaw naman ng ama niya kaya nakakaramdam na ng unti-unting galit sa puso ang dalaga.

Gusto man niyang sagutin ang ama at ipamukha dito ang mga kasalanan nito, hindi niya magawa dahil sa natitirang respeto niya para rito. Gusto niya man sumbatan at saktan ang ama pero hindi niya kaya dahil isa siyang duwag.

"Gago! Isinisi mo pa sa anak ko ang pagiging matapobre ng kabit mo! Manang-mana sa mga magulang mo! Lumayas ka na dito bago ko pa ibato sa'yo ang kaldero!" galit na sigaw ng ina ni Kellissa.

"Talagang aalis ako! P*****a!" sigaw pabalik ng ama ni Kellissa at sinipa pa nito ang nadaanan na mga punda sa gilid.

Napahigpit naman ang yakap ng dalaga sa ina nang maramdaman ang panginginig nito sa galit.

"Bakit hindi niyo sinabi sa akin na pumunta pala kayo noong nakaraan sa Papa mo?" mahinang tanong ng ina bago kumawala sa yakap niya.

Napakagat naman sa labi si Kellissa at hindi gusto ang tinutumbok ng ina. Nanatili lang siya na nakayuko at walang sinabi.

"Hindi ba sinabi ko sa inyo, kung hanggang maaari ilayo niyo ang sarili niyo kay Gio at Uriella? Tignan niyo at pinag-iinitan na naman kayo lalo na si Kendy!" gigil na wika ng ina bago nanghihinang napaupo sa mono block na upuan.

"Sorry po, Mama." tanging nai-usal ng dalaga. Napabuntong hininga naman ang ginang at hinawakan ang kamay ng anak.

"Sa susunod na kantiin ulit kayo ni Uriella, sabihin niyo sa akin. Hindi iyong kayo ng gagawa ng paraan. Paano kung saktan kayo ng wala ako?" naging malumanay ang boses ng mama ni Kellissa kaya nakaramdam ang dalaga ng pagkirot sa puso niya.

"Bakit sila pa ang may ganang magalit kung sila naman ang may mali? Ma, hanggang kailan ba tayo magpapaapi sa kanila?" tanong ng dalaga at ramdam niya ang paglukob ng pait at sakit sa puso niya.

Tumayo ang ginang para yakapin ang anak. Hindi nito mapigilan ang pangilidan ng luha sa nakikitang sakit sa mga mata ng anak.

"Pasensya na, anak. Pasensya na kasi hindi ko kaya nabigyan ng maayos na buhay at kumpletong pamilya. Patawarin niyo si Mama kung minsan ay nagiging mahina ako." usal ng ina kaya hindi na napigilan ni Kellissa ang mapahagulgol sa bisig ng ina.