Chapter 39 (Dwight)

"PUWEDE ba muna tayong mag-usap?" seryosong tanong ni Syrellie kay Dwight.

Kasalukuyan silang naglalakad patungong pintuan. Pauwi na ang binata. Pinapatulog na kasi ni Yaya Melly ang kambal, dahil pasado alas-otso na ng gabi. Oo, gan'on katagal ang inilagi nito sa apartment nila. Doon na nga rin naghapunan si Dwight. Ito ang um-order ng pagkain nila. Nagpa-deliver na lang ito ng Jollibee foods. Iyon kasi ang request ni Kelly. Mukhang nagustuhan ng anak niya ang pagkain sa Jollibee. Sabagay, sino ba naman ang hindi? Halos yata lahat ng bata ay gusto si Jollibee.

Gusto sana niyang tutulan ang request ni Kelly. Hindi kasi maganda sa kalusugan ang gusto nitong kainin. Pero sinabi ni Dwight na paminsan-minsan lang naman daw—na sinang-ayunan naman ni Yaya Melly. Pinagkaisahan siya ng dalawa. Mukhang wala na siyang kakampi.

Napalabi siya sa naisip.

Ngali-ngaling tadyakan na niya kanina si Dwight, umuwi lang ito. Kaso kapag nakikita niyang nag-i-enjoy at masayang-masaya ang mga anak nila'y