Kabanata 80

Blair Castro

MABILIS kong pinatay ang TV nang bumaba sa hagdan sina Lira kasunod ang mga kuya niya. Naghaharutan sila sa itaas kanina habang nandito ako sa sala at nanuod ng news sa umaga. Lumabas na ang totoo tungkol kay Alicia at pinipiga ngayon ng media ang pamilya Gonzales. Pati si Lukas ay hinahabol ngayon ng media dahil sa pagkabulgar ng katotohanan kaya hindi ito makapunta dito sa amin. Kagabi nga ay sa office na raw siya natulog dahil tiyak raw na susundan siya ng mga reporters.

“Mama, bakit di po napunta dito si papa?” tanong ni Owen na kumalong sa akin.

Kinagat ko ang pang-ibaba kong labi. Sinuklay ko ang buhok niya gamit ang daliri ko. “Marami kasing trabaho si papa.”

Tumango siya. Muli kong binuksan ang TV at inilagay sa cartoons. “Manuod muna kayo, ha. Dito lang ako sa labas,” paalam ko sa mga bata saka ako lumabas ng bahay.