Chapter Twenty

SI GB ang unang nabungaran ni Hannah nang imulat niya ang kanyang mga mata. Well, wala na rin naman siyang ibang inaasahang makita kundi ang kanyang bespren. Napakaimposible namang ang mga magulang niya ang kanyang makikita. Wala naman ang mga ito sa bansa at kung naririto man, nakasisigurado siyang hindi siya pag-aaksayahan ng mga ito ng oras. Wala naman kasi siyang kuwenta sa paningin ng mga ito. 

Agad nagliwanag ang mukha ni GB nang makita siya. Nang tumayo ito ay inakala niyang hahalikan siya nito kaya nanghaba pa ang kanyang ngusi pero nagkamali siya. May pinindot lang pala itong buton sa kanyang may ulunan na alam niyang nakakonekta sa nurse station. Ibinalitang gising na siya. Sa pagkapahiya tuloy niya’y kinamot na lang niya ang kanyang nguso. Makaraan lang ang ilang sandali ay bumukas na ang pintuan at pumasok ang nurse ngunit hindi ito nag-iisa, may resident doktor na kasama.