Chapter 52

HINDI inaasahan ni Damon ang tawag na iyon ni Athena, nasa Manila ito ngayon at planong makipagkita sa kaniya. Sa ilang buwang hindi pagpaparamdam nito ay tila himala na sa wakas ay nagreply na ito sa mga chat niya.Hindi man gaano malinaw sa kaniya kung bakit naroon ang dalaga ay hindi na mahalaga. Masaya siya dahil magkikita ulit sila ng nobya, marami siyang gustong ikwento dito sa mga nakalipas na buwan kaya naman nangako siyang mas gagalingan niya sa next round. Ang round na ito ang magsasabi kung makakapasok sila sa finals.

" Ready ka na ba, Damon? Halika na magsstart na tayo," anang isang producer.

Hinanda niya na ang sarili at agad na nakaramdam ng excitement,kumpyansa siyang makukuha niya ang titulo bilang ' Pinoy Chef Idol' kahit na magagaling ang lahat ng makakalaban niya. At pag nangyari nga iyon ay mas makikilala siya at sisikat pa ang kaniyang restaurant.

" Ito na 'yun, Dad at sana nanonood ka," aniya sa sarili.

" Good luck, Damon!" ani Terry na nasa likuran niya na pala.