CHAPTER 36

Isang malalim na buntong-hininga pa muna ang pinakawalan ni Lorenzo bago niya inabot ang doorknob ng pinto ng kanyang condo unit. Pinihit niya iyon saka dahan-dahan nang binuksan. Agad na sumalubong sa kanya ang katahimikan nang humakbang siya papasok habang iginagala pa ang kanyang paningin sa kabuuan niyon.

Galing siya ng Olivar Furniture Company. Doon siya nagpalipas ng buong magdamag matapos ng naging pagtatalo nila ni Tamara kagabi. Katunayan, hanggang ng mga oras na iyon ay suot niya pa rin ang mga kasuotang nasa katawan niya kahapon.

He didn't bother to change kahit pa may ilang damit din naman siya sa kanyang opisina. Pagkaalis niya kasi ng condo kahapon ay sa isang restobar muna siya dumiretso at alak ang binalingan kahit pa maaga pa nang mga oras na iyon.

Hindi niya maiwasang lunurin ang kanyang sarili sa pag-inom. Punong-puno siya ng hinanakit matapos ng naging pag-uusap nila ni Tamara. Parang isang video tape pa na paulit-ulit niyang nakikita sa kanyang balintataw ang ekse