Kabanata 73

Mahirap magtanim ng galit dahil sa oras na anihin mo na ito, makakalimutan mo kung gaano kahalaga ang pag-ibig na nabuo mo sa panahong pinili mong itago ito.

Isang dokumentong matagal nang nakatago ang walang pag-iingat na pinirmahan ni Lera sa tapat ng kan'yang kaibigang si Maris. Iniabot niya ito dito pagkatapos.

"Alam mo na ang gagawin mo," seryoso niyang saad kasabay nang walang humpay na pagtunog ng kan'yang telepono.

Pinatay niya din kaagad nang makitang mula iyon kay Lucas.

"Sigurado ka na ba?" maingat na tanong ni Maris.

"Oo." Hindi man lang siya kumurap nang sabihin iyon.

Kinakain ng galit ang kan'yang puso sa tuwing naaalala ang tagpo kahapon. Wala nang pag-asang magbago si Ginang Juana. 

Maghahain siya ng kaso laban sa ginang. Matagal niya nang ginawa iyon subalit ibinasura lamang ito ng korte. Magbabasakali muli siya. Mataas ang kumpyansa niyang papabor na ito ngayon sa kan'ya dahil mayroon na siyang pera.