Prologue

Habang binabaybay ni Daniexsa ang mahaba at madilim na pasilyo ay mas humihigpit naman ang paghawak nito sa kanyang baril. Mas sumeryoso ang ekspresyon ng mukha nito nang makarinig s'ya ng isang malakas na tili na nagmumula sa isang abandonadong kuwarto ng hotel. 

Nakarinig pa s'ya nang ilang tawanan kaya mas lalo s'yang nakaramdam nang pag ngingitngit sa kanyang dibdib dahil sa mga asal asong kalalakihang alam n'yang may maduming ginagawa.

Bago n'ya buksan ang pinto ay agad n'yang iniyos ang suot na mask na kanyang gamit sa tuwing s'ya ay sasabak sa mga misyon. 

Marahas n'yang sinipa ang pinto at halos magiba naman ito sa lakas ng kanyang pagkakasipa at doon ay nadatnan n'ya ang apat na kalalakihang para bang mga asong ulol na sabik sa buto at laman. 

     "Tingnan mo nga naman ang grasya! May dumagdag pa sa'yo, miss!" Natatawang saad ng isang lalaking kalbo at malaki ang tiyan. 

Nagawa pa nitong humimas sa kanyang pagkalalaki kaya nakaramdam nang pagkaasiwa si Daniexsa dahil sa kanyang nasilayan. 

     "Ang ganda ng porma mo, miss ah? Iyan na ba ang usong damit ngayon?" Mapanuya pang saad ng lalaking isang hangin na lang ay magkakalas na ang mga buto sa sobrang payat nito. 

Ultimo ang mga pisngi nito ay lubog na sa kapayatan. 

     "Bitawan n'yo s'ya kung ayaw n'yong masaktan!" May halong pagbabanta sa boses ni Daniexsa ngunit nagkatinginan naman ang apat na lalaki at ilang segundo pa ay sabay sabay na naghalakhakan. 

     "Teka nga, miss? Sino ka ba ha? Ano? Pakiramdam mo si wonder woman ka- a-aahh! A-Aray! A-Aray!" Sigaw ng lalaking may kahabaan ang buhok nang akmang hahawakan s'ya nito sa balikat ngunit agad n'yang hinuli ang kamay nito at mabilis na iniikot kaya halos mamilipit ito sa sakit. 

     "Papakawalan n'yo s'ya? O kailangan ko pa kayong turuan ng leksyon isa-isa?" Mahina ngunit sapat na upang marinig ng tatlo pang lalaking nasa harapan ng dalaga. 

Imbes na masindak ang mga ito ay nagkatinginan pa ang mga ito at para bang nag-uusap gamit ang kanilang mga mata. 

     "Mayabang kang pakialamera ka ha!" Singhal ng isa at agad nitong inilabas ang kutsilyo na nakasiksik sa kanyang tagiliran at agad na sumugod sa kinaroroonan nang dalaga. 

Agad n'yang sinipa ang lalaking nahuli n'ya kanina at napaigik ito sa sakit nang tumama ang likod nito sa sahig. Mabilis naman n'yang napigilan ang lalaking may hawak na patalim at sinikmuraan ito dahilan upang mabitawan nito ang kutsilyong hawak at mapaluhod. 

Sumugod rin ang isa pa ngunit bago pa man ito makalapit kay Daniexsa ay nanlaki na ang mga mata nito nang salubungin s'ya ng sipa ng dalaga. Halos panawan ito ng ulirat at dali-daling tinulungan ang dalagang nakahiga pa sa semento habang nakatali ang mga kamay at paa. 

     "S-Salamat.." nanginginig na saad ng biktima at kasabay no'n ay ang panlalaki nang mga mata nito. "Sa likod mo!" Sigaw nito. 

Agad namang kumilos si Daniexsa at agad s'yang gumulong papalayo. Doon ay mas klaro n'yang nakita ang isang lalaki na hawak ang patalim at muntik pa na s'yang masaksak. 

Agad s'yang bumangon at mabilis na tumakbo upang bigyan nang malakas na sipa sa dibdib ang lalaki. Nang tuluyang tumama ang sipa nito ay para huminto ang tibok ng puso nito bago tuluyang matumba sa sahig. Habang ang iba naman ay nakaluhod at humihingi nang tawad dahil sa kanilang kapangahasan. 

     "Pangako, hindi na mauulit!" Umiiling pang saad ng kalbong lalaki habang magkalapat ang mga kamay at paulit-ulit itong ikinukuskos sa sariling palad. 

     "P-Patawarin mo na kami, miss! Magpapakabait na kami simula ngayon!" Pagmamakaawa pang saad ng isa ngunit bahagya lamang tumaas ang kilay n'ya sa narinig. 

     "Sa presinto na lang kayo magpaliwanag." Tipid nitong saad at mabilis na inilabas ang kanyang baril na ang bala ay isang uri ng pampatulog at tig iisa n'ya itong pinatamaan sa leeg. 

Wala pang ilang segundo nang bumulagta na ito sa sahig at tanging s'ya at ang babaeng biktima na lang ang naroroon. Agad itong lumapit sa kanya at bahagyang ngumiti. Bago s'ya nito yakapin ay inayos pa nito ang suot na malaking salamin. 

     "Maraming salamat! Kung hindi dahil sa'yo.. b-baka, b-baka napahamak na ako!" Humihikbi nitong saad kaya bahagya na lamang n'yang tinapik ang balikat nito. 

Matapos nitong gamitin ang telepono nang dalaga upang humingi ng tulong sa pulisya ay nagpaalam s'yang aalis na ngunit ang totoo ay pumunta lamang s'ya sa pinakataas nang bahagi ng gusali at hinintay ang pagdating nang mga pulis upang masigurado ang kaligtasan ng babaeng kanyang sinagip. 

Ilang minuto ay narinig n'ya na ang wawang ng sasakyan nang mga pulis at agad na dinakip ang apat na mga lalaking kanyang pinatulog habang ang isang pulis naman ay nakaantabay sa babaeng kanyang iniligtas. 

Napahinto si Daniexsa nang maramdaman ang pag vibrate ng kanyang sariling telepono kaya agad n'ya itong kinuha at napabuntong hininga ng makitang si Allen ang tumatawag- ang matalik nitong kaibigan. 

Labag man sa kanyang loob ay in-off nito ang kanyang telepono at inayos ang suot na earpiece sa kanyang kaliwang tenga. 

     "Mission accomplished," aniya at walang pag aalinlangan s'yang tumalon sa likod ng mataas na gusali upang makaalis na sa lugar.