Chapter 98

Nakauwi kaagad si Grim kaya hindi nakalapit na si King.

“Kailangan kitang ilabas,” kahit ligtas na sa silid ni Grim ay hininaan pa rin niya ang boses.

“Bakit? May masama bang nangyayari?” nag-aalalang tanong ni Anastacia.

“Hindi, pumayag na si Neo na tumulong at gusto nilang ilabas ka na namin dahil mapanganib.”

Nagliwanag ang mukha ni Anastacia. “Totoo bang pumayag ang emperador?”

Nakangiting tumango si Grim. “Kaya puwede na kitang ilabas, mas magiging maayos rin kung mailalabas kita dahil baka mahuli ka na rito. Hindi natin alam kung may nakararamdam na rin,” sabi ni Grim.

“Ayoko namang maging pabigat, pero—“

“Huwag mo nang alalahanin si King, kami na ang bahala sa kanya. Sa ngayon, mas magiging madali na kung maiaalis ka namin dito. Bukas ay may misyon ako, maaga tayong aalis, ipapalagay ko na lang na natakasan mo ‘ko,” sabi ni Grim.