Chapter 4: The Will

"Dad!" Agad na tumakbo sina Ree at Antonia papalapit kay Preston. Yumakap naman si Ree at halatang nagpapasaklolo sa ama habang siya naman ay prente lang na nakatayo at bitbit ang mahaba niyang pasensya.

"Preston, pagsabihan mo nga iyang anak mo! Masyadong bastos. Basta-basta na lang siyang papasok dito sa bahay nang hindi man lang humihingi ng tawad sa damage na ginawa niya kagabi!" sumbong naman ni Antonia sa asawa.

Ang ama ni Yanna na si Preston ay tahimik lang siyang tinitigan. Halata sa mukha nito ang pagod at galit ngunit pinipigilan lamang nitong ibulalas iyon sa kanyang harapan.

"Pasalamat ka't napapayag ko si Mr. Welsh na pumunta kang muli doon," panduduro nito sa kanya. "Pumunta ka sa suite niya mamayang gabi. Pagkatapos ng hapunan, siguraduhin mong mapapaligaya mo siya, naiintindihan mo?!"

Napailing si Yanna. "Hindi ako pupunta sa kanya," pagtutol niya.

"Marianna Aleinne del Valle! Naririnig mo ba ang sarili mo? Kapakanan ng kumpanya natin ang nakasalalay rito! Hahayaan mo na lang ba na mauwi sa wala ang lahat ng pinaghirapan ng namayapa mong ina? Yanna, hija... ginagawa ko na ang lahat para maisalba ang kumpanya. Ito lang ang tanging paraan para naman makabawi ako sa kanya."

"Makabawi?" Napapalatak siya. "For 10 years, you've abandoned me! Hinayaan mo akong ipatapon sa probinsya tapos ito ang sinasabi mong pagbawi? Ang ibenta ang puri ko?!"

"Hija, wala na tayong ibang choice. Ikaw lang ang tanging naiisip ko na makakagawa nito. The company is in crisis! Kapag hindi natin nakuha ang investment ni Mr. Welsh ay katapusan na nating lahat! Kaya kailangan nating sundin ang kanyang gusto at iyon ay ang makasama ka niya."

Tila pinagpira-piraso ang kanyang puso sa harapan ng mga ito. Hindi niya akalain na ang ama na kanyang kinasabikang makasama ay ang mismong tao na magpapahamak sa kanya. Alam niya ang kapasidad ng kanyang ama ngunit mas masakit pa rin pala ang marinig ito mula sa bibig nito.

Pinigilan niya ang mga luha at saka itinuro si Ree. "Bakit hindi na lang siya ang ibigay mo sa matandang iyon? Tutal, anak mo naman siya, 'di ba?"

Napasinghap si Antonia. "How dare you? Alam mong engaged na si Ree. Gusto mo pang dungisan ang kanyang reputasyon!"

"Ahh... Kaya ba ako ngayon ang gusto ninyong ipain? Ako naman ngayon ang sisirain ninyo? Dahil isa akong probinsyana?"

"Tumigil ka na, Yanna!" sita ni Preston. "Hindi pwede si Ree. Importante ang kanyang engagement sa mga Dimarco. Hindi natin pwede i-risk iyon ngayon. That's why I am asking you to do this. You're single. Hindi naman masama si Mr. Welsh. He's a good catch, hija."

"Sinabi ko na at hindi ko na uulitin pa, Papa. Hindi ko magagawa ang gusto ninyo. And besides, mukha pa bang matutuloy ang engagement ni Ree gayong ayaw ng mga Dimarco na madikit sa mga kerida?"

Biglang nanginig sa galit si Antonia nang banggitin ni Yanna ang salitang iyon. Isang salita na habambuhay nitong dala-dala. Para kay Yanna ay mananatiling kerida si Antonia kahit pa na matagal nang namayapa ang kanyang ina. She knew about her dad's affairs since then. Alam niya kung paano nadurog ang puso ng kanyang ina dahil sa pambababae ng kanyang ama. At isa iyon sa dahilan kung bakit wala siyang ka-amor-amor sa dalawang ito sa bahay.

"Yanna, let's stop this bickering and just do what I say! Inuulit ko, pupunta ka kay Mr. Welsh. Don't be so stubborn. Kung gusto mo pang makuha ang mana mo mula sa iyong ina, kailangan mong sundin ang lahat ng ipinag-uutos ko!" sigaw naman ni Preston.

Napabilog naman si Yanna sa kanyang dalawang kamao. Halos mamuti na ang mga ito sa sobrang higpit ng kanyang pagkakabilog. At heto na nga ang kinatatakutan niya... ang gamitin ng kanyang ama ang tungkol sa kanyang mana.

Hindi naman lingid sa kaalaman ng mga ito ang pagpapakita niya ng interes sa pagkuha ng kanyang mana mula sa kanyang yumaong ina. Ito ang tagubilin sa kanya ng kanyang lolo na si Alfonso del Valle, ang ama ng kanyang ina na si Andrea.

Noong una ay wala naman siyang pakialam sa mana na makukuha niya mula sa kanyang namayapang ina, ngunit ngayon ay mas tumindi ang kanyang pag-asam lalo pa at gusto niyang malaman ang mga ginawang kalokohan ng kanyang ama sa nakalipas na taon. Gusto niyang malaman ang dahilan ng pagkalugi ng DV Incorporated.

Walang sabi-sabi na tinungo ni Yanna ang pinto palabas. Akma na sana siyang aalis nang biglang may pahabol na sinabi ang kanyang ama.

"Subukan mong umalis at sisiguraduhin kong pagsisisihan mo ang pagsuway sa akin!" pagbabanta nito.

Nakatayo lamang si Yanna doon at hindi lumingon sa ama. Pagkatapos ng ilang saglit ay agad na siyang umalis sa bahay nang hindi inaalintana ang pagtawag sa kanya ng ama.

****

Sa araw ding iyon ay nakipagkita si Yanna sa isang tao na nagngangalang Atty. Lambert Lozada. Ito ay ang best friend at family lawyer ng kanyang yumaong ina. Naroon sila sa isang restaurant.

Malawak na ngiti ang ibinigay nito sa kanya. "Yanna, I'm so glad to see you! How are you?"

"Okay naman po, Attorney. Pasensya ka na at tinawag kita rito. Gusto ko lang kasing masagot ang mga katanungan ko."

"Walang problema, hija! Your late mother was my best friend kaya hindi ka na iba sa akin. So, you're asking about the last will, right? Here it is..." Nag-abot ito ng malapad na envelope sa kanya.

Binuksan niya ito at humantad sa kanya ang Last Will and Testament ng kanyang ina para sa kanya. Binasa niya itong maigi hanggang sa napakunot ang kanyang noo.

"A-attorney, tama po ba ang pagkakabasa ko rito? Hindi po ba ako namamalik-mata?" Ipinakita niya ang parte na iyon sa matanda.

Napatango naman ang huli. "Yes, that is exactly what your mother had stated. Miss Yanna del Valle, you can inherit 70% shares of DV Incorporated once you turn 20 and... only if you will enter into marriage," pagsisiwalat nito na kanyang ikinagulantang.

"W-what?!"