Chapter 5

DAPIT-HAPON, kasalukuyan na nasa garden si Marilyn at nagdidilig ng mga halaman nang mapansin niyang wala na sa kinauupuang bench si Maya. Sinarado ng dalaga ang gripo at iniligpit ang hawak na hose, pumasok siya sa bahay at naabutan niyang nasa sala ang kanyang mga magulang nanonood ang mga ito ng telebisyon.

"Nay, napansin n'yo po ba si Maya?'' tanong niya sa ina.

"Nagpaalam na pupunta daw siya sa kanyang kuwarto doon na lang daw siya maglalaro," anang kanyang ina na muling ibinalik ang paningin sa pinapanood.

"Ganoon po ba, sige po akyatin ko na muna si Maya." Paalam niya sa mga magulang.

"Ipaghahanda ko kayo ng juice, may niluto akong pansit mag meryenda kayong dalawa ni Maya."

"Sige po inay, kayo ba ni itay nakapagmeryenda na?"

"Hindi pa naman anak, mauna na lang kayo ni Maya. Alam mo naman ang itay mo gustong kasama ako kapag nanonood siya ng paborito niyang pelikula,"

Napangiti siya sa sinabi ng ina.

"Sa sala nalang tayo mag meryenda inay para makakain na din kayo ni itay," anya at muling nagpaalam na aakyat na ng pangalawang palapag para puntahan ang pamangkin.

Tumalikod na ang dalaga, tumayo naman si Aling Pacing para pumunta ng kusina at maghanda ng pagkain para sa kanilang meryenda.

SAMANTALA... malapit na si Marilyn sa kuwarto ng pamangking si Maya nang may marinig siyang mga yabag sa loob ng kuwarto nito, parang naghahabulan. Dinig niya ang matinis na boses ni Maya habang tumitili ito sa tuwa.

Napakunot-noo si Marilyn.

"Habulin mo ako!" Boses ni Maya ang narinig ng dalaga na para ba'y hindi ito nag iisa sa loob ng kuwarto nito. Muli niyang narinig ang mga yabag na tila naghahabulan habang panay ang tawa ng kanyang pamangkin.

Tumigil siya sa tapat ng pinto ng kwarto nito, idinikit niya ang kanang tenga sa pinto para pakinggan ang nasa loob.

"Ang daya mo naman lagi mo akong nahuhuli, ako na naman ulit ang taya." Tila nagmamaktol na reklamo ni Maya pakiwari ng dalaga may kauasap ang bata.

Hindi na nakatiis ang dalaga kaya pabigla niyang pinihit ang door knob at tinulak ang pinto. Nakita niya ang bahagyang pagkagulat sa mukha ni Maya, nakaupo ito sa ibabaw ng kama habang sinusuklay ang mahabang buhok ng manika.

Inilibot ni Marilyn ang paningin sa loob ng kuwarto ni Maya pero wala siyang ibang taong nakita bukod sa kanyang pamangkin. Pero kanina lang dinig niya na parang may ibang kasama ang bata at may kalaro, lumapit siya sa kama at bahagyang yumuko sinilip niya ang ilalim ng kama nito pero malinis iyon. Tumayo ang dalaga, nilapitan naman niya ang malaking closet. huminga muna siya ng malalim bago buksan ang closet, puro mga nakatupi na damit ang nakita niya. Dahil iniisip ni Marilyn na baka nagtatago ang kausap ni Maya kaya sinubukan niya itong hanapin.

Bumaba ng kama si Maya habang mahigpit na yakap ang manika, lumapit ito sa dalaga na nakaharap sa binuksang closet.

"Tita!" tawag pansin nito sa dalaga.

Napalundag sa gulat si Marilyn naisapo niya ang isang kamay sa tapat ng dibdib. Huminga muna ng malalim ang dalaga bago humarap sa pamangkin,

"Maya," anya na pilit na ngumiti sa bata.

"Ano po ang ginagawa mo tita?'' tanong ni Maya na sumilip na din sa nakabukas na closet.

"Ha, ah, eh," bigla siyang nag isip ng isasagot. "W-wala may hinahanap lang si tita," pagsisinungaling niya at mabilis na isinara ang closet. Gusto niya sanang tanungin ang pamangkin tungkol sa kanyang narinig pero naisip niya na baka guni-guni niya lang iyon at baka matakot pa ang bata.

"Ano naman po ang hinahanap mo tita?" muling tanong pa nito.

Bahagya natigilan si Marilyn.

"Ah wala 'yon," sagot niya. "Tara na bumaba na tayo, hinihintay na tayo ng lolo at lola mo." Inabot niya ang isang kamay ni Maya at hawak-kamay na lumabas ng kuwarto.

Hindi na napansin ng dalaga ang gumuhit na isang ngiti sa labi ng manika.

NAPANSIN ni Aling Pacing ang pananahimik ng anak, hindi nito naituloy ang pagsubo ng pasit muli niya itong ibinalik sa plato.

"Anak, may problema ba?" tanong ni Aling Pacing sa dalaga

Agad na naiangat ni Marilyn ang ulo.

"Wala naman po inay," kaila niya. Hindi niya masabi dito ang totoong gumugulo sa isipan niya. Pilit kasing sumiksik sa kanyang isip ang mga narinig niya kani-kanilang sa loob ng kuwarto ni Maya. "Naalala ko lang po iyong isang estudyante ko, mag babakasyon daw po kasi dito sa pilipinas." Dugtong pa niya sa sinabi, pero gawa-gawa niya lang iyon para lang may maidahilan siya sa ina.

"Ganun ba, e di masaya kasi makakapasyal siya dito sa ating bansa." Anang ginang at itinuloy na ang pagkain. Pinagmasdan ng dalaga ang ina, mukhang naniwala naman agad ito sa sinabi niya.

Ipinilig ni Marilyn ang ulo pipilitin niyang huwag isipin ang narinig kanina, baka pagod lang siya. Ilang araw din kasi silang walang magandang tulog. Baka namamahay pa siya dahil ilang araw pa lang naman silang naroroon sa bahay ng kanyang ate.

"Tita, gusto ko pa po ng pansit," tawag pansin sa kanya ng katabing si Maya. Mabilis naman niyang kinuha ang plato nito at nilagyan ng pansit.

"Masarap magluto ang lola ano?" tila patanong niyang sabi sa pamangkin.

Ngumiti ang bata kahit na puno ang bibig nito ng pansit, sabay thumbs up pa nito.

Natatawang pinisil niya ang baba nito. "Ang cute mo talaga!" tila nang gigigil niyang sabi sa bata.

"Ako gusto ko pa din ng pansit, mahal.'' Ani Mang Alfonso sabay abot ng plato sa asawa. Inabot naman ito ng ginang at nilagyan ng pansit.

"Ikaw anak baka gusto mo pa?'' tanong ni Aling Pacing.

"Mamaya na nay, pero tirhan mo po ako baka maubusan ako ni tatay at ng batang matakaw diyan." Nakangiting sagot niya sa ina sabay pisil ulit sa baba ni Maya. Narinig niya ang sabay na pagtawa ng kanyang mga magulang dahil sa kanyang sinabi.

"Narinig mo ang sinabi ng anak mo?"

"Oo na, kapag may natira," biro ng kanyang ama, natawa naman ang dalaga sa sinabi nito.

Maganang inubos nga nila ang masarap na nilutong pansit ng kanyang ina habang nagkukulitan sa sala, syempre ang laging bida ang kanyang mahal na ama.