Chapter One Hundred Fifty

   UMALIS na papuntang opisina si Aevo ng umagang iyon. Habang si Minnie ay nasa loob lang ng bahay, kinailangan niyang sundin ang utos ng asawa. Dahil pinagbantaan pa siyang sasaktan lalo kapag hindi siya susunod sa gusto nito.

Katatapos lang niyang magpatuyo ng buhok at nakaharap siya ngayon sa salamin. Kung saan kitang-kita niya ang sugat sa noo. Napangiwi siya nang maramdaman niya ang hapdi ng gamutin niya iyon ng bulak na may antseptic.

"Hindi lahat ng babaeng nakakatagpo ng prince charming nila ay may magandang happily ever after... katulad mo na lang Minnie," tuya niya sa sarili habang nakaismid sa sariling repleksiyon. Inilihis niya ang manggas ng suot niyang long sleeve at nakita niya ang nagmarkang itim na pasa na si Aevo rin naman ang may kagagawan.

At sa tuwing makikita niya ang mga iyon ay labis-labis na hinanakit ang nadarama niya.

Sobra siyang nasasaktan, dahil ang matamis nilang pagmamahalan ay tuluyan ng naglaho.