Chapter 30

Chapter 30

Iyak ako ng iyak habang pilit kong pinupulot ang mga gamit kong nagkalat at unti-unting nababasa ng ulan. Pinanood lang ako ng mga guwardiya sa ganoong posisyon at halos wala na akong mukhang maiharap sa kanila dahil sa pagkapahiya.

Umalis si Tita. Siguradong umuwi na siya. At alam kong galit na galit siya pero wala akong ibang mapuntahan. Siguradong wala na akong trabaho. Galit na galit sila. Galit na galit si Third.

Gusto kong magmakaawa na sana pakinggan niya ako. Gusto kong lumuhod sa harap niya para makiusap. Pero kaya ko bang harapin ang galit niya sa ngayon? Gusto kong humingi ng tawad. Hindi literal na tama si Tita pero pinaniwala ko siya na sinusunod ko ang utos niya kaya may kasalanan rin ako. Kahit sa loob-loob ko ay hindi ang utos ni Tita ang dahilan ng lahat ng ginagawa ko.

Gustong-gusto ko si Third. Gustong-gusto ko siya. At habang binabalikan ko ang mga nangyari sa pagitan naming dalawa ay mas lalo lang akong nadudurog. Imposible nang mangyari lahat ng iyon.