Strike three and it’s out

Hindi na namalayan ni Celina na nakatulog na pala siya sa kakaiyak, nagising na lang siya sa pagkakahimbing dahil narinig niya ang ngawa ni Lucien, tumingin muna siya sa orasan bago tumayo.

Mag-aala singko na pala ng umaga, nagmadali siyang lumapit sa anak para tingnan kung anong problema, kinuha niya ito at hinele, kaya naman muli itong bumalik sa pagtulog, dahan-dahan niya itong inilapag sa crib nang makasiguradong nahimbing na ito muli.

Pinagmasdan niya ang nahihimbing na anak, nag-iisip kung ano na ba ang dapat niyang gawin, alam niya naman na sa oras na ikasal si Vincent at Nina ay magkakaroon na din ito ng mga sariling anak, napapaisip siya kung paano gagawin ni Vincent na tuparin ang pangako nito na pananagutan ang anak niya kung magiging abala ito sa magiging anak sa babaeng iyon.

Nagulat na lang siya nang biglang bumukas ang pinto ng kuwarto, mula doon ay pumasok ang gegewang-gewang na si Vincent, halatang nasorpresa ito nang makita siyang nakatayo sa tabi ng crib ni Lucien.