187.

“Napakatigas ng ulo mo, Charlotte! Nakita mo na ang nangyari sa’yo?” Saglit na umubo ang daddy ni Charlotte, sakay na sila ng sasakyan ngayon. “Paano kung sa susunod ay hindi lamang iyan ang abutin mo?”

“Dad, ayos lang ako.” Pinigilan ng dalaga ang mapangiwi, lalo lang siyang pagagalitan ng magulang kapag nakita ng mga ito na nasasaktan siya. Pagdating sa hospital ay agad na inalis ang bala sa kanyang balikat, maging ang sugat sa kanyang ulo ay ginamot na.

Naalala ni Charlotte ang takot at pagsisisi sa mukha ni Loisa. ‘Hindi na rin pala masama ang minsan na magpakita ng kapangyarihan.’ Napabuga ng hangin ang dalaga. Pero dahil ro’n ay nalaman ng lahat kung sino ang kanyang mga magulang. Ang matagal ng katauhan na tinago ni Charlotte ngayon ay hindi na lihim.

Isang araw ang lumipas. Hindi magawang umalis ni Charlotte dahil binantayan ang dalaga ng kanyang magulang. Kaya ng umalis ang ina at ama ay agad siyang gumayak. Kailangan niyang puntahan si Johnson para bigyan ng babala.