CHAPTER 98

Minabuti ni Victor na huwag nang tumuloy. Tulala siya sa loob ng kotse pagpasok niya roon. Wala rin siya sa sarili habang binabagtas ang hagdan ng ospital patungo sa kuwarto ng kanyang ama. Hinila pa siya ni Sharko.

“Boss, bakit po ba parang wala kayo sa sarili? Ano po bang nangyayari sa inyo?”

“Pagod lang siguro ako.”

“Gusto na po ba ninyong umuwi kina Ma’am Nadja?” Umiling si Victor. Nagdadalawang isip na siya ngayon.

Sa loob ng kuwarto ay magandang balita naman ang sumalubong sa kanya. Puwede nang mai-discharge ang ama upang sa mansion na lang ipagpatuloy ang pagpapagaling nito. Mas mainam na masikatan siya ng araw at makalabas sa bakuran.

Sa rooftop ng ospital ay puwede silang makapagpaaraw tuwing umaga ngunit hindi magiging maganda kung polluted ang hangin doon. Mahihirapan ang ina na magparoo’t parito kahit naka-wheel chair si Max.

“Ipapahanda ko ang mansion, Mama.”

“Victor…”

“Wala na ang mga ulupong sa mansion. Pinalayas ko na po silang lahat.” Matapang nitong sabi sa i