Chapter 39

Ngunit kinaumagahan ay nagising ako dahil sa malakas na iyak ni Jaidah, habang ang sigaw ni mommy ay dinig na dinig ko dahilan para tumayo ako at magmadaling lumabas.

Wala pang suot na bra ay napapunta ako sa bookstore, ngunit nakita ko kung paano nagpumilit pumasok ang mga kalalakihan na galing sa gobyerno.

At naitulak si mommy at Jaidah, umawang ang labi ko nang makita kong kunin nila lahat ng libro. Lumapit ako kaagad, “A-Anong ginagawa niyo!?” Hinila ko ang kamay ng isang lalake ngunit malakas niya akong itinulak dahilan para sumalampak ako sa sahig.

“Huwag na kayong manlaban, kinukumpiska namin ang lahat ng nandito dahil wala kayong permit,” malakas na sabi ng lalake na ikinataka ko.

“Ilang taon na nakatayo ang bookstore na ‘to! Anong walang permit!?” galit na sabi ko.

“Itigil niyo ‘yan!” sigaw ko.

“Ano ba!”

“Huwag na ho kayo manlaban para walang masaktan!” nauubos pasensya na sigaw ng isa, halos mangiyak ako nang makita kong malukot ang ibang mga libro at masira ang seal nito.