Book 10: Chapter 12-Rancho

HINDI mawala sa isip ni Arcile ang nangyari kahapon. Hindi siya makapaniwalang magawa niya ang bagay na iyon. Hindi niya akalaing kaya niya palang lumipat sa isang kabayo habang tumatakbo ito. Ilang ulit niyang napanuod ang balitang nag-trending sa facebook at youtube. Ngayon niya ramdam ang takot para sa sarili kung sakaling nahulog din siya.

Napatitig si Arcile sa babaeng katunggali. Walang halong pagkukunwari o pabida ang ginawa niyang pagligtas sa buhay nito kahapon. Natakot siya ng mga oras na iyon para sa buhay ng babae at hindi para sa buhay niya kaya walang pagdalawang isip na tinulongan ito. Naipagpasalamat niya lamang at parang taong may-isip ang kaniyang kabayo. Tinulongan siyang mapadali ang paglipat sa kabilang kabayo. Bonus pa at nauna ito sa finish line kahit wala nang sakay.

"Ayos ka na ba ngayon?" masuyong tanong ni Argus sa nobya. Hindi niya iniwan ito sa silid mula kahapon dahil nagkaroon ito ng aftershock sa nangyari kahapon.

Nakangiting tumango si Arcile sa nobyo.