Epilogue

IVAN

"Lagi na lang kayong nagkakalabuan ng nobya mo."

Sinulyapan ko si Ate na biglang sumulpot sa aking likuran. Narito ako sa balkonahe at nagpapalamig ng ulo. Nagtalo na naman kasi kami ni Maureen. Lagi na lang ganito. Parang nang isang linggo lang nag-away na naman kami.

Bumuntong hininga ako saka muling tinuon ang tingin sa may garden. Tinungga ko ang bote ng beer na hawak ko at piniling huwag magsalita. Wala naman akong maisip na sabihin.

Totoo naman ang sinasabi ni ate. Lagi-lagi na lang. Napakaisip bata kasi ni Maureen, mula nang maging kami para bang wala siyang character development. Ilang taon na kaming magkasintahan. Kapag nagtatalo kami, pinipili ko na nga lang na i-ignore siya dahil ayaw kong makapagsalita sa kaniya ng hindi maganda. Lalo at kinabukasan makikipagbati din siya sa akin. We're already adult pero pakiramdam ko, nasa high school pa din siya, hindi man lang siya nag-mature ng kaunti. Pero kahit na ganoon siya, mahal ko siya. Lahat naman ng tao may mga flaws.