CHAPTER 19

Pulang-pula na ang balat ko na tila hinog na kamatis nang napagpasyahan kong itigil na ang kakukuskos. Kahit naman anong hilod pa ang gawin ko, kahit nga siguro buong linggo akong magbabayad sa banyo ay hindi na mawawala ang pakiramdam na naging hatid sa akin ng halik ni Alexis.

Hindi ko na mababago pa ang katotohanang ang hindot na 'yon ang sumisid sa pinakatatago kong perlas ng silangan. Ilang beses kong ikiniling ang aking ulo at sinabunutan ang sarili kong buhok, bago nagkaroon ng lakas ng loob na lumabas ng banyo.

Nagtungo ako sa harap ng full body size mirror saka pinasadahan ng tingin ang hubad kong katawan. Parang wala namang nabago. Pantay pa rin naman ang dibdib ko. Ganoon pa rin ang size niyon. Sexy pa rin naman ako. Pero bakit pakiramdam ko ay hindi na ako ang may-ari ng sarili kong katawan?

Nang haplusin ko ang aking leeg kung saan mayroong maliliit na pulang marka ang nagkalat, para bang bigla akong nakaramdam ng hiya. Hindi lang sa leeg ko mayroon ang mga pulang marka.