Chapter 83: Not Invited

Hindi ako mapakali nang gabing iyon lalo na nang malamang wala rin sa bahay sina Daddy at Azalea. Panay ang silip ko sa labas ng bintana matapos kumain ng dinner. Tuloy pa rin ang pagbuhos ng ulan na walang kapaguran. Mas lumalim ang pag-aalala ko. Kung anu-anong negative thoughts ang bumabalot sa aking isipan. Ipinilig ko ang ulo. Pilit na ibinaling ang atensyon sa ibang bagay pero bumabalik pa rin talaga sa matinding pag-aalala kung nasaan na si Chaeus.

"Nakakainis na naman siya. Saan pa ba kasi siya pumunta? Pagabi na. Kay Lailani ba?"

Sumama na ang panlasa ko nang maisip na baka nga nasa piling na ito ngayon ni Lailani. And only God knows kung ano ang ginagawa ng dalawa. Isabay pa na sobrang lamig ng panahon.

"Sana man lang ay nagsabi siya para alam ko di ba? Hindi iyong pinapag-alala niya ako. Teka nga, bakit ko ba siya inaalala? Matanda na iyon."

Badtrip na kinamot ko ang ulo. Bumabangon na ang matinding inis ko. Dapat ay hindi ako nag-alala and I am minding my own business!