Chapter 25 Ang Pagsabog ng Emosyon

"EXPLAIN!"

Akala ni Judith ay tatahimik lang si Storm kahit nakasakay na sila sa sasakyan pero nagulat siya sa bigla nitong pagsigaw. Pakiramdam niya tuloy ay natanggal ang lahat ng tutuli niya. Dumagundong din ang tibok ng kanyang puso. Hindi niya napigilan ang kabahan.

Ibang-iba kasi ngayon ang hitsura ni Dr. Storm Davis ngayon. Makikita talaga sa guwapong mukha nito ang matinding galit.

"Bakit kasama mo ang Jiwan na iyon?" Gigil nitong tanong sa kanya. Mahigpit na mahigpit ang hawak nito sa manibela kahit hindi niya alam kung may plano na ba itong paandarin ang sasakyan. Gayunman, naka-start na ang sasakyan. Ewan nga lang kung in-start lang iyon para gumana ang aircon.

"Naki-share lang siya ng upuan," sagot niya pagkaraan ng ilang sandali. Nangangamba kasi siyang kapag hindi nito nakuha agad ang sagot na gusto nito ay magmura ito nang magmura o kaya naman ay magwala na parang bata.

"Ang daming upuan," gigil pa rin nitong sabi pero naramdaman niyang unti-unti na itong kumakalma.