Chapter 43

Amber Pov

Magkasabay kaming napatili ng malakas ni Tita Aloha nang paulanan kami ng bala ng mga taong sakay ng itim na kotseng sumusunod sa amin.

"Who the hell are they?" nanginginig sa takot na tanong ni Tita Aloha habang bahagyang nakayuko ang ulo sa takot na baka matamaan ng bala. "May malaking atraso ka ba sa ibang tao? May inutangan ka ba na hindi mo binayaran kaya ipinapapatay ka na, Amber?"

"Hindi ko alam kung sino sila, Tita Aloha. At wala rin akong atraso o utang sa ibang tao kaya hindi ko alam kung bakit nais nila tayong patayin," mabilis kong sagot sa kanya. Muli kaming napatili nang paulanan ulit kami ng bala ng kotseng sumusunod sa amin.

"Bilisan mo, Amber! Maaabutan na nila tayo!" takot na sigaw ni Tita Aloha.

Malawak at bago pa lamang na nabuksan ang kalsadang tinatahak ng kotse ko kaya wala pang masyadong dumadaan. Maaaring magkarerahan ang mga sasakyan sa kalsadang ito dahil walang mga enforcer na maninita. Ngunit hindi ako sanay magpatakbo ng kotse na sobrang bilis.