Chapter 2

Kinaumagahan, bago umalis ng bahay ang Daddy ni Girly, ay ipinaalala muna nito sa kanya na hindi siya pwedeng lumabas ng walang kasamang bodyguard.

Nagkibit balikat lang si Girly sa sinabi ng Daddy niya. Sinadya niya rin na hindi kausapin ang ama dahil gusto niyang ipakita at ipadama ang sama ng loob niya.

Dahil sa bad mood ang dalaga, hindi na siya nag almusal pa sa bahay nila at maaga siyang nagpunta sa main office nila na may nakabuntot na mga bantay.

Si Girly ang namamahala ng lahat ng negosyo ng pamilya nila. Mula ng maupong Mayor ng bayan nila ang kanyang ama ay sa kanya na ipinagkatiwala ang pagpapatakbo ng negosyo.

Ang Mommy naman nila ay may sariling dental clinic. Dentista kase ang kanyang ina. Habang ang bunso niyang kapatid na si Andrei ay nag aaral pa rin sa university.

Oras na ng lunch break, nasa loob pa rin si Girly ng opisina niya.

Tumaas ang isang kilay ng dalaga ng makita niyang pumasok si Vincent sa loob ng opisina niya na may bitbit na mga bulaklak.

"Hi, for you..," bati ng binata at ipinatong sa lamesa ni Girly ang mga bulaklak ng hindi iyon tanggapin ng dalaga.

"Bakit ka narito?" tanong ni Girly ng maupo sa tapat niya ang lalaki kahit na hindi naman niya inalok na umupo ito.

"Para makita ka at gusto ko sanang ayain ka na rin na magtanghalian." sagot ni Vincent.

"Nakapaglunch na ko kanina." wika ni Girly kahit ang totoo ay hindi pa siya nananghalian.

"Alam kong hindi ka pa kumakain, Girly. Mag lunch na lang tayo malapit dito o kaya kung gusto mo ay dito na lang. Magpabili na lang tayo ng pagkain sa labas." saad ni Vincent na pilit na ngumingiti kahit na napapahiya ito.

Nakabukas kase ang pintuan ng opisina ni Girly at naroon ang assistant ng dalaga at isang empleyada nila.

"Look, marami akong ginagawa at wala akong time para makipagplastikan sa iyo, Vincent. Alam kong may nagrereport sa inyo ni Daddy, kung anong ginagawa ko at kung nasaan ako. Alam ko ang totoong pakay mo rito. Hindi ako magpapakasal sa iyo dahil lang sa nakipagkasundo si Dad sa inyo. Hindi ninyo ako mapipilit sa gusto ninyong mangyari." prangkang saad ni Girly.

Ngumisi si Vincent at bumulong sa tainga ni Girly. "Wala ka namang magagawa kahit na tumutol ka sa kasunduan, matutuloy pa rin ang planong kasal."

Sinamaan ng tingin ni Girly si Vincent. Dama niya na may iba pa itong gustong sabihin sa kanya ngunit hindi nito masabi dahil naroon ang ilang tauhan niya malapit sa kanila.

"Kung ayaw mong kumain na kasama ako, fine! Kita na lang tayo bukas sa bahay ninyo. I'm sure namang nasabi na sa iyo ni Mayor na bukas na kami mamanhikan sa inyo." muling saad ni Vincent sa dalaga at tumayo na ito sa kinauupuan.

"Bakit mo kailangang ipilit ang sarili mo sa akin, Vincent? maraming babae diyan sa tabi na gugustuhin na makarelasyon mo o maging asawa mo. Bakit ako?" lakas loob na tanong ni Girly.

"Dahil ikaw ang gusto ko mula pa noon, Girly." walang alinlangang sagot ni Vincent sa kanya bago ito tuluyang lumabas sa opisina ng dalaga.

Nagpupuyos sa inis si Girly sa sinabing iyon ni Vincent. Naiinis siya sa kakulitan ng lalaki. Batid naman na kase ni Vincent na hindi niya ito gusto. Ilang beses na nga niyang binasted, pero sadyang obsessed sa kanya si Vincent.

Nakarating din sa kanya noon na kaya walang maglakas loob na manligaw sa kanya na ibang lalaki ay dahil sa pinagbabantaan ni Vincent ang mga nagbabalak pa lang na pumorma sa kanya.

One time nga ay may pinabugbog si Vincent na pinsan ng kaibigan niyang si Marina na akala ay nanliligaw sa kanya. Mula noon ay hindi na siya hinanapan ng magiging boyfriend ng mga kaibigan o kakilala niya.

Kaya lalong iniwasan ni Girly si Vincent dahil sa pagiging mapanakit nito. Nagseselos kahit na wala namang karapatan. Inaangkin siya nito, wala naman siyang binibigay na permiso. Paano niya pa gugustuhin ang lalaking alam niyang mahihirapan siyang pakisamahan at ang malalang naisip pa niya ay baka saktan lang din siya ni Vincent kapag naging asawa na niya ang lalaki.

"Hindi ko hahayaan na matali ako sa iyo, Vincent." aniya sa sarili ng makita niyang nakalabas na ng pintuan ang lalaki.

"Ma'am, totoo po bang malapit na kayong ikasal?" tanong ni Marites na isang staff sa opisina.

Napabuga ng hangin si Girly sa tanong na iyon at nakita niya rin sa mga mata ng assistant niya na interesado rin ito sa isasagot niya.

"Tess, gusto mong magtagal sa trabaho mo dito di ba?" patanong na sagot ni Girly sa babae.

"S'yempre naman po, Ma'am Girly." agad na sagot ni Marites.

"Then, iwasan mong maging tsismosa. Ayokong makarating sa ibang tao ang kung anong nakita at narinig ninyong dalawa ni Claudia kanina, nagkakaintindihan ba tayong tatlo?" mariing utos ni Girly sa dalawang babae na sabay naman na sumagot ng yes Ma'am sa kanya.